香港國際車展推校際比賽 設計香港街景賽道

有時玩賽車遊戲，都想試下揸香港街景賽道。黛安知道，香港國際車展2020會喺明年7月舉行，鑑於近年電競活動盛行，車展主辦機構國際車展（香港）管理有限公司就推出首個香港校際汽車賽道設計比賽，畀全港15歲或以上、非大專院校學生以校際形式組隊參加，希望藉住呢個比賽，學習STEM知識，仲可獲得創作賽道嘅獨特體驗。

黛安聽公關姊妹講，參加隊伍要以香港作為藍圖，選出本港任何一個、混合多個區域，或者以構想出嚟嘅新區，將香港獨特地理元素、大型地標同景點，融入虛擬賽道設計中。勝出隊伍除咗有獎學金，作品仲可以安裝喺香港國際車展現場嘅賽車模擬器，畀入場人士試玩，更有機會打造成為專屬香港嘅電競賽車遊戲。

國際車展（香港）管理有限公司總經理歐陽嘉敏女士就話，已向全港500間學校發邀請，希望可以吸引50隊以上隊伍參加，比賽亦可將近年香港積極推行嘅STEM教育融入設計與藝術意念；學生喺設計過程中加入香港著名地標同建築，亦可以令佢哋了解唔同地區典故同歷史，提升對香港嘅歸屬感。

主辦機構仲會為參賽隊伍舉辦工作坊，教授設計軟件基本操作、如何精進技巧等，等參賽隊伍利用設計軟件糅合攝影、城市規劃、土地測量、2D和3D設計等元素。黛安聽落都覺得好玩啊，如果想參賽，由即日起至明年1月10日可上網報名㗎，詳情可瀏覽www.imshk2020.com。