阿嬌（鍾欣潼）近日與老公賴弘國齊齊上由蔡康永及小S（徐熙娣）主持嘅節目《花花萬物》，大談婚後生活。阿嬌同賴弘國拍拖僅僅半年就宣布訂婚，上年拉埋天窗之後，人前人後都非常恩愛，不過甜蜜背後，二人都經歷過唔少難關。
（網上圖片）
婚事曾遭父母反對
賴弘國嘅家世背景雖然稱唔上豪門，爸爸係公務員而媽媽就係老師，都算係平凡又穩定嘅普通人家。賴弘國喺節目中大爆起初父母親未認識阿嬌之前，曾經阻止佢迎娶阿嬌，原因係唔想阿仔娶名人引起關注，但了解阿嬌之後，態度就180度改變，非常滿意呢個新抱仔。
賴弘國父母（右一、二）（網上圖片）
婚後賴弘國帶媽媽去睇阿嬌演唱會，媽媽仲感動喊住話：「原來我們的媳婦這麼優秀。」至於婚後之婆媳關係，阿嬌話自己同奶奶嘅關係比老公同佢阿媽之間嘅關係仲更加好添！
（《花花萬物》節目截圖）
（《花花萬物》節目截圖）
夫婦財政狀況懸殊
阿嬌承認當日求婚喺由自己做主動，佢話賴弘國感動到佢終認定對方。不過二人財政狀況懸殊嘅問題亦隨時間浮面，賴弘國曾經出信用卡畀阿嬌任碌，由出道紅到依家嘅阿嬌使錢亦一啲都冇手軟，賴弘國曾經指佢買手袋唔睇價錢，畀老公講完之後阿嬌都收歛咗，好多時都係齋睇唔買。
（《花花萬物》節目截圖）
另外，阿嬌嘅「世紀婚禮」都係由老公全數負責開支，因為阿嬌唔想有「拿錢把自己嫁出去」嘅感覺。二人舊年喺美國舉行婚前派對，之後返香港補擺喜酒，話晒都係明星級婚禮，就算做醫生嘅賴弘國都直言甚有壓力：「怎麼會有人結婚結到快破產。」
明星婚禮使費唔講得笑！（東星娛樂）
男方緋聞不斷
阿嬌同賴弘國由拍拖開始已經不被睇好，除咗爆出賴弘國曾經結婚之外，仲有指佢身邊非常多女伴。不過時間證明一切，賴弘國並冇令阿嬌失望，一切都係子虛烏有。直到近日又再傳出有關賴弘國嘅謠言，正當大家都擔心聚少離多嘅佢哋感情危危乎，阿嬌都一於少理，對老公投下信任嘅一票，並指：「是我一個黑粉黑他的。」完全無損二人感情。
（網上圖片）
生育問題未有共識
現年38歲嘅阿嬌對於生b嘅問題甚為進取，一早做咗雪卵嘅佢為此受咗唔少苦頭，之後更因荷爾蒙嚴重失調導致暴肥。而訪問中，兩人大方公開睡房，被發現她們床邊有一個紅色的娃娃擺設，賴弘國自爆是外母送來祝他們早生貴子的禮物。
兩人希望最好可以自然受孕，阿嬌更曾提議老公試提取精子，但賴弘國就成日稱工作太忙，未有配合佢嘅試管計劃：「突然想起我凍了3顆卵，其實好渺茫，我都叫他試一下，不然對不起3顆卵子！但他還沒去試，我也有狂叫他去配呀！我幾顆可憐的卵子！都想快點試一下行不行，不行就再想其他方法」。
（《花花萬物》節目截圖）
撰文: 黃蘊姿