避免任何肌膚刺激

讀者︰「我和妹妹塊面都好似地圖，有一笪笪深褐色不規則形狀的色斑，我已用盡市場上的美白產品都未能改變，已死心了！」我︰「色斑是內因性的，使用產品是不能令色斑完全消失的。」讀者愈講愈肉緊︰「我妹仲年輕，仲好貪靚，又學人買好多洗面刷啊，磨砂啊，去死皮呀，想把這些討厭的斑點磨走晒，我叫佢慳啲啦！我做咗幾十年呢啲動作，都未成功過啊！」我︰「提起黑斑就會令人馬上想起紫外光，但其實任何肌膚的刺激都可以促進黑色素細胞分泌更多黑色素，目的是為要保護皮膚。你用的洗臉刷、磨砂，甚至雙手的摩擦刺激，也會使到皮膚變得深色。」

讀者︰「我妹常用指甲刮佢塊面啲色斑呀！怎料愈刮愈深色似的。」我︰「好明白啊！我青春期時，不時都有長暗瘡的。一次我跟男同學去鋸牛扒喎，男同學一路眼甘甘望住我粒暗瘡，當時我真係好想攞個餐刀切咗個粒瘡呀！其實健康情況下，曬黑或着色的肌膚會隨新陳代謝，不斷向上推移，當這些細胞移至外層的角質層後，老化角質就被新細胞推擠而剝落，毋須刻意去角質或使用甚麼磨皮的。」讀者︰「唔覺嘅？自然剝落？」

我笑︰「你以為鬼片《畫皮》，好似面具咁剝落咩！其實空氣裏有很多老化角質（死細胞），只是我們察覺不到。所以醫學上而言，就算不洗面，皮膚也不會髒污，因為皮膚會自然新陳代謝的。」讀者︰「那麼是否我面皮太厚，所以着色的細胞一直未移到外層脫落，所以我的黑斑一直存在呢？」我︰「一般28日為肌膚新陳代謝的周期，但年紀大了，周期會延長，加上是內因性，我們是有色人種，體內不斷分泌色素。小時候還不懂甚麼防曬措施，去沙田踏單車大半天回來曬黑了，因為年輕皮膚新陳代謝呈巔峰狀態，已曬黑的皮膚很快就恢復白嫩了。」（本欄逢周三、五刊登）