PMQ deTour 2019 逾60場藝術活動免費玩

藝術能陶冶性情，黛安最近知道，PMQ元創方今個月29日至12月8日將舉行為期10日嘅deTour 2019，期間會舉行超過60場藝術活動，好似設計裝置及展覽、工作坊同設計講座等等，全部費用全免，歡迎公眾參與。

聽公關姊妹介紹，今次PMQ嘅活動非常精采，好似策展人梁展邦邀請咗6個本地及海外嘅設計單位，將新作置於花崗岩地基遺迹中，映照出新與舊事物同設計創作嘅關係；而喺地基之上、地面廣場內仲會展出設計師們創作時嘅日常物件至概念草圖，等大家可以了解佢哋嘅創作過程。此外，英國著名圖像及字體設計大師Neville Brody，以及香港著名攝影師及導演夏永康，都會分享佢哋嘅創作過程。

至於喺工作坊，就有本地視覺藝術家Rex Koo用幾何圖形拼湊出經典藝術名畫、與竹製工藝品牌二回以麻葉編織技巧，製作出自然小器物等；設計講座就會有Design Anthology、TEDx Wanchai等策劃單位；咁多藝術活動，大家唔好錯過啊。