鄭敬基於1990年結婚，曾有一個幸福嘅家，有一對仔女。1995年佢有感事業去到樽頸位，於是一家4口移民加拿大，頭2年佢主要做電台工作，間中返港拍劇，生活本來都好穩定。不過一直冇乜緋聞嘅鄭敬基，原來背後曾三番四次出軌，前妻Winsome發現嘅都有3次，最終Winsome在忍無可忍之下離婚。
當時鄭敬基主演電視劇《烈火雄心》爆紅，事業攀上高峰，為咗挽救婚姻，急急放低一切返加拿大箍煲，可惜一切已經太遲，Winsome唔想再擔驚受怕，去意已決。
（鄭敬基Facebook）
鄭敬基一對仔女。（東星娛樂）
鄭敬基自責痛哭2年，一對仔女跟隨媽媽生活，實質是5人行。Winsome同現任丈夫Peter非常大方，畀鄭敬基搬到附近，方便隨時探仔女，前妻又教導得仔女好好，令佢哋冇嬲鄭敬基，仲同佢好Close，鄭敬基更加同前妻同佢丈夫做到好朋友。前妻不計前嫌，原諒咗鄭敬基，前妻同佢講咗一番令佢畢生難忘嘅說話：「你記住，即使第日你老咗，第日再婚識過第2個女仔，你啲小朋友永遠都錫你、原諒你；第二，我都原諒咗你；第三，主都原諒你，但你要原諒自己。」Winsome嘅修為之高令人佩服，鄭敬基亦都話自己好幸運有呢位前妻。
大仔結婚時，鄭敬基伉儷（右一、二）同前妻Winsome（左二）同佢現任丈夫Peter（左一）合照。（鄭敬基Facebook）
56歲嘅鄭敬基依家重新開展事業，又以過來人告誡偷食男：「今時今日我見到好多男人跌落呢個陷阱，希望佢哋從我呢個例子睇到，你今次跌咗落去，你以為就完，其實只係開始，直至痛到、喊到抽搐，再回首一望，你已經冇咗一啲好愛你嘅人，冇咗珍貴嘅光陰。當你想犯錯嘅時候睇到呢啲嘢，你就唔會犯錯。」
鄭敬基同囡囡似足兄妹。（鄭敬基Facebook）
鄭敬基同現任太太一齊出席阿仔畢業禮。（鄭敬基Facebook）
2016年鄭敬基閃娶拍咗拖唔夠一年嘅細19歲嫩妻，佢亦脫胎換骨變身癡情男，仲經常公開同老婆示愛：「深深感受到你用好多愛去照顧我，令我生活上有好多體驗，亦都有好多新鮮嘅學習，令我生活真係快樂咗好多好多。感謝主有你呢個天上嚟嘅禮物。雖然我成日同你講好多謝你做我老婆，不過你好似唔係好在意。其實我想同你講，每日我瞓醒嗰時我都會望你嘅，有你喺我身邊太好喇！」真係睇字都打冷震！不過遇到對的人就要好好珍惜喇！
（鄭敬基Facebook）
（東星娛樂）
撰文：黃蘊姿