商台DJ森美近日接受杜汶澤網台節目訪問，透露今年遇到一個健康問題。事緣他發現口腔內有粒黑色像痣的物體，起初沒有理會，後來牙醫朋友為他檢查時，被對方的話嚇倒，「臨走佢無端端睇住我，我仍然記得佢個表情：『得閒約出嚟見面，下星期約朋友出嚟飲嘢。』佢講出我個心立即怯咗一怯。」後來他上網搵資料，估計是色素瘤，是皮膚癌的一種，在口腔出現的存活率大約是2成，幸好檢查後證是良性瘤，並已接受手術切除。
森美在節目中大爆健康一度出現問題。（圖片：《杜汶澤 喱騷 Chapman To’s late show》節目截圖）
森美直言過程中心情忐忑，幸好一切已經確認安好。(圖片：森美IG)
森美昨日出席公開活動，被問及健康現況，他表示：「件事係4至5月的時候發生，上顎有撻黑色嘢，好在唔係生喺身體度，又發現得早，我做完手術休息咗半日就繼續開咪同錄影《娛樂大家》，其實係小手術。有2個禮拜等化驗，好忐忑，因為上網睇嘅案例唔多。當時老婆喺英國陪阿仔考會考，我打電話畀佢，當然佢都好擔心啦，不過我哋都有信仰，就每晚祈禱，係孤單少少啦。工作上我有同小儀（電台拍檔阮小儀）講，仲有電視節目工作人員，因為如果我真係患癌症，工作上都要另有安排。」直至報告出來，森美和太太陳雅嫻都鬆一口氣，確認一切安好，才將事情告知父母。
森美直言發生健康危機時，令他一再檢視自己跟家人的關係，他說：「有日我望住個女做功課，呆望望足一個鐘，個女問我咩事，我話冇事。佢哋大個咗就會明生老病死係必經階段，更會珍惜大家。如果有事，我會遺憾有啲嘢未教佢哋，幸好自己有寫書同專欄，我同佢哋講過如果有日我唔喺度，佢哋就睇我嘅書同專欄啦，我想講嘅都寫晒落去，不過，佢哋至今都未望過我啲書。」
森美出事，身在英國的太太擔心不已。(圖片：森美IG)
太太為了一對仔女，飛到英國。（圖片：陳雅嫻IG）
森美好錫一對仔女，等待報告時他呆望女兒一小時。（圖片：陳雅嫻IG）
撰文：楊安莉