Pink Run慈善跑嘉年華 籌款義助貧困家庭防癌

乳癌係香港女性嘅頭號敵人，當然要好好宣傳預防措施！黛安聽公關姊妹講，Pink Run.HK 2019，將於11月17日喺香港赤柱大街舉行，活動籌得嘅善款，將用於資助本地經濟有困難嘅高危家庭，進行基因突變測試、輔導工作、預防措施及臨床醫學研究等。即日起開始接受報名喇！

黛安知道，今次賽事設有3大組別，包括5公里個人賽、1公里親子賽同粉紅高踭鞋100米賽事，大人細路都可以參加，完成賽事後仲可獲紀念獎牌，同埋總值高達600蚊嘅粉跑禮品。

要宣傳乳房健康，又點止跑步咁簡單？到時大會仲特備粉跑Pink Run.HK 2019慈善嘉年華，跑手、參賽者或市民大眾都可以免費參與現場各大品牌嘅攤位遊戲同表演活動，包括資料庫「任搶」零食檔、遊戲攤位、至FUN夾公仔及各式表演等，寓娛樂於慈善、寓慈善於健身，真係一舉多得！黛安已打算約埋一班好姊妹齊齊參加喇！