香港單車節10月開鑼 踩上昂船洲大橋

暑假係一個進行戶外運動嘅好日子，鍾意踩單車嘅朋友要留意喇！黛安知道，由香港旅遊發展局主辦、新鴻基地產冠名及慈善贊助嘅「新鴻基地產香港單車節」會喺10月13日舉行，下個星期三（7日）上午10點起，到8月20日會接受網上報名，名額有限啊！

今年賽事有「50公里組」、「30公里組」、「家庭單車樂」、「男子公路繞圈賽」、「女子公路繞圈賽」，同埋新增嘅「繽紛型格單車樂」。適合有速度耐力同豐富經驗單車手參加嘅「50公里組」，今年會繼續挑戰長青隧道、南灣隧道、尖山隧道、青馬大橋、汀九橋同昂船洲大橋，名額有3,300個，比舊年多咗200個。至於「30公里組」就適合有騎行經驗嘅單車愛好者參加，騎手可以踩上昂船洲大橋，名額都多咗200個，今年有2,000個㗎。

除咗有特定會員資格，或曾完成相近程度單車活動嘅人士，其他報名「50公里組」（個人及隊制）同「30公里組」嘅參加者，事前要通過大會安排嘅單車技術評核啊。而新增嘅「繽紛型格單車樂」，參加者就可以着上唔同創意服飾去享受騎行樂趣，聽落都覺得好玩！

報名詳情可到http://register.hongkongcyclothon.com瀏覽。