近距離互動 睇20米藍鯨模型 ifc商場化身海洋世界

一提起夏天，唔少人都諗起海洋世界，黛安知道，中環ifc商場中庭即日起至8月18日期間，會化身成壯麗嘅海底世界，有一系列珍貴展品同互動體驗，包括一條長達20米，仿照真實藍鯨製作嘅實體模型「Cherish」等，大家可以近距離同呢條來自深海嘅「巨無霸」互動，了解下奇特海洋生物嘅演變，有嘢睇又學到嘢，大家唔好錯過啊！

黛安聽公關姊妹講，今次展覽係由ifc商場同洛杉磯自然歷史博物館、香港大學理學院合作，希望為訪客帶來博物館級嘅體驗，訪客可以喺柔和嘅鯨魚「歌聲」帶領下，分別遊覽三個富有教育意義嘅「島嶼」展區，好似「生命大爆發」、「千奇百怪的寶貝」同「巨型的海洋王者」等。場內會展出多款只喺中國同加拿大海域發現，首次喺香港展出嘅稀有海洋生物化石同奇特生物標本，仲有像真3D模型同「與藍鯨同游」嘅擴增實境（AR）互動體驗，絕對係趣味與知識並重。

ifc商場今次仲請來港大地球科學系張敏青博士，同生物科學學院副教授David M. Baker做展覽顧問。張博士話，今次喺「奧妙海洋」中展出嘅早期海洋生物化石同生物標本，可以睇到呢啲海洋生命嘅起源，同埋佢哋嘅獨特故事㗎，黛安都好期待想去睇下。

如果想深入了解多啲，ifc商場由今個星期六（3日）開始，會連續三個星期六同星期日設有導賞團，名額有限，想報名快啲預約喇！