FWD x 吉卜力工作室 飛入《天空之城》搵《龍貓》

相信唔少人同黛安一樣，由細睇《龍貓》、《天空之城》同《千與千尋》等動畫長大，大家有無諗過可以親身走入電影場景呢？香港粉絲期待已久嘅FWD x《吉卜力的動畫世界》今個星期六（3號）就開幕，現場將展出多個家傳戶曉嘅立體場景，粉絲有機會同龍貓、無面男打卡喇！

黛安知道，展覽有唔少紀念品出售，大會將部分設計原稿印製成明信片；部分喺香港站獨有，以純手工方式製作嘅獨家幻燈片紀念禮盒套裝，每盒內附9張幻燈片，全部係精選嘅吉卜力經典動畫場景，包括《哈爾移動城堡》全貌、《魔女宅急便》中琪琪嘅麵包店等，隨盒仲附上一個小型紙燈箱，只要利用手機電筒，就可投映出經典場景，極具收藏價值㗎。

門票即日起喺Cityline或Trip.com票務平台有售，想去睇嘅朋友，記住8月3號至11月3號去九龍灣Portal 6311喇！