廣告人飲食指引

4天前

靚，it is everything。之所以廣告人做飲食，通常不單止好味，更必定會佐之以品味，這才可以滿足到腌尖一族，包括佢自己。

廣告公司老闆劉桂玉開的私房粵菜，名字倒過來就叫玉桂樓，完全達到「靚場靚飯心情靚」的水準。原址天后清風街乒乓球室，現鋪上了英國百年大宅老橡木地板，以西班牙藝術家Miro、法國畫家Marco Del Re真迹為裝飾，掛上芬蘭50年代「雲」水晶燈，還有Frank Lloyd Wright的古董餐椅，真係見到已好開胃。

12道菜的餐單當然不簡單，頭盤「好東西」是冬茸蛋白鮮蝦和西瓜番茄凍湯，紅綠映照在老廣州圓紋陶杯內，恍若盛夏飛過的玉蜻蜓。「賽西牛」是澳洲Kobe Cuisine和牛腱，配上西瓜和自家製醬汁，盛放在英國Wedgewood五花彩蝶骨瓷上，明明飄來了肉香，眼睛卻見到了花香。金漆黑釉土鍋內的薑蔥炒鮮蟹配蛋炒麵，必須連汁都撈埋才盡得精華。最後是「雪雪燕」，冰糖燉雪梨紅棗雪燕，襯上東京金邊玉彩小燉盅，滋陰悅目，仲想點？

今個仲夏特別躁鬱，是夜「玉」涼如水，清熱降火，好食又好睇，四小時忘卻人間亂世。

2小時前

日劇《昨日的美食》，津津有味。是同性戀人同居生活的日常，細膩動人，幽默又勇敢。西島秀俊飾演律師，為人精打細算，負責一日煮三餐，內野聖陽是感性隨性的髮型師，負責食和洗碗。從身邊的家人、同事和朋友，反照出同性戀如何面對社會的目光和制度。別以為這樣的題材太沉重，這劇的對白和表情精采到肉，令我忍不住邊睇邊大聲爆笑。最厲害的是以煮食貫穿全劇，看了一集西島教煮三文魚牛蒡舞菇燉飯，我真的走去廚房學一半卻又唔學一大半，煮了一個日本罐頭吞拿魚多水飯……惟有set靚啲餐具，唔好食更加要好好睇睇，廣告人宗旨。

（本欄逢周二刊登）