澳門喜來登「檳城之夜」 嘗馬拉美食歎榴槤

夏天又係食榴槤嘅季節喇！黛安聽公關姊妹講，澳門喜來登大酒店今日（12號）起至下個月11號，會舉辦期間限定嘅「檳城之夜」自助晚餐，除咗有正宗檳城美食外，仲有多種馬來西亞榴槤任君選擇。

聽講酒店特登請咗來自檳城嘅廚師團隊，烹調一系列檳城地道佳餚，包括亞參叻沙、檳城印度咖喱飯、橋治城點心、福建蝦麵等等；仲特設戶外榴槤專區，有8款唔同品種，包括享負盛名嘅「貓山王」、濃郁蘇丹王（D24）、回甘紅蝦（D175）、酒香XO、甜滑金包（D13）、鮮甜紅肉（D101）等等。為咗比食客有置身檳城嘅感覺，餐廳仲會融入澳門街頭嘅壁畫藝術。

放暑假可以帶埋一家大細去澳門玩番幾日，依家訂位成人每位只需澳門幣438元，小童每位澳門幣200元，另加澳門幣200元或者318元就可以任食榴槤喇！