網上珊瑚魚資料庫啟動 認識本港罕見瀕危物種

黛安放假時鍾意去海邊度假，有時仲會去玩浮潛，但估唔到原來香港嘅海底都有成差唔多400種珊瑚魚㗎！國際海洋保育組織BLOOM噚日開始推出咗一個香港專屬嘅珊瑚魚資料庫網站，當中有唔少係香港罕見嘅瀕危物種，例如10年未有喺本港水域中發現嘅蘇眉、同至少22種在香港未有官方記錄嘅魚類品種。

BLOOM喺5年前進行咗一項水底調查計劃，集結逾100個義工組成潛水團隊，喺香港各個潛水點進行咗超過176,537分鐘嘅水底調查，成功記錄近400個魚類品種，噚日正式推出網上珊瑚魚資料庫「114°E香港珊瑚魚調查網站」（https://www.114ehkreeffish.org/），記錄咗至少88個珊瑚魚科，合共接近400個珊瑚魚品種同資料，如教你點分雌雄、有關魚類嘅有趣資訊等，方便熱愛潛水人士一目了然。

網站遲啲仲會開放畀公眾一齊上載珊瑚魚嘅資料，只要有相丶水深同出沒地點，就可以交畀BLOOM審核，等黛安下次潛水時都影多啲相先。