商台DJ森美近日拍咗一個同親情有關嘅廣告, 內容係講述一啲關於佢同屋企人嘅回憶, 同佢對家人嘅真實感受。雖然森美出名轉數快, 口才好, 但當佢講到屋企人時, 瞬間變到好嚴肅, 仲講講吓喊咗出來... 森美喺廣告入面, 話佢同媽媽相處咗咁多年, 一直有啲說話從來未有講過出口。而喺佢求學階段期間, 亦曾經發生過一件事, 令佢覺得自己對爸爸有份愧疚嘅感覺, 直到依家都仲記得好深刻...
(片段截圖@森美Facebook)
(片段截圖@森美Facebook)
(片段截圖@森美Facebook)
森美心愛家人 卻從未敢對家人講出心裡的那份「情」
森美喺廣告入面, 有講到佢對父母嘅感覺。佢話自己一直都未試過同媽媽講「我愛你」, 亦未曾攬過媽媽, 錫過媽媽。然後, 佢又分享咗一件喺佢讀書時期發生嘅事, 而件事係同佢爸爸有關... 森美話佢以前做學生嘅時候係住寄宿學校, 有次因為佢要去九龍塘考試, 所以森爸專程揸車入赤柱接佢出市區。森美回想坐車當日, 個天落好大雨, 架車去到淺水灣沙灘對出嘅位置, 架車突然爆車軚。當時森爸非常焦急, 因為知道森美要趕去考試, 森爸為咗唔想耽誤佢考試嘅時間, 即使身上無遮、無雨褸, 森爸都嘗試用膠袋笠住個頭, 走落車自行換軚。呢一幕畫面令森美歷歷在目, 講到一半就已經忍唔住喊咗出嚟, 仲話:「當時感覺到, 原來爸爸嘅辛苦, 令到你有安逸。」
(森美父母結婚相@sammy903)
為人父母方知父母感受 森美慨嘆自己對爸媽未夠好
森美同太太陳雅嫻結咗婚19年，育有一仔一女。佢同太太嘅關係一向都好好, 無論係做電視或電台節目, 都會成日提著自己老婆。而兩個仔女就已經長大, 仔仔前年仲去咗外國讀書。森美本來唔贊成仔仔出國，因為佢覺得一家人係應該要走埋一齊，仲表明「好唔捨得」, 不過, 森美最後都係諗通咗, 所以放手畀仔仔出去闖。森美表面睇落好似好硬朗, 但原來佢內心係一個好感性嘅人。佢近日喺社交平台上，除咗分享呢個廣告外，佢亦有撰文講出自己嘅真實想法：「當仔女大到咁上下，佢哋開始有自己嘅生活，開始離開我去搵佢哋嘅天地，嗰種失落，令我體會到阿爸阿媽嘅心情，令我終於明白到自己畀阿爸阿媽嘅愛原來唔夠。」
(森美藉廣告講出心底話@森美Facebook)
(森美與太太@sammy903)
(森美太太與囡囡@陳雅嫻ig)