王俊棠在《愛回家之開心速遞》入面飾演池富一角，劇中有池子孝同池美麗兩個仔女，而現實生活中，棠哥都有兩個囝囝，大仔王子銘是攝影師，而細仔王東泰跟隨爸爸的腳步入行演戲，雖然在訓練班畢業之後由低做起，曾經離開又再拍劇，無論他的選擇如何，王俊棠總是百分百支持。
詳情請Click入：
孻仔孻心肝，王俊棠提到細仔東泰總是甜到入心。（《晴報》圖片）
王俊棠在劇集中經常演奸角。（圖片：王俊棠微博）
經常在大小劇集都蝦蝦霸霸，深入民心。(圖片：王俊棠微博)
王東泰今年快將27歲，長得高大、白淨，十足有韓星風範，訪問當日他陪伴爸爸到場，即時被我們要求一齊做訪問。爸爸王俊棠在過往電視劇集中，總是扮演惡霸、壞蛋等的角色，但《愛回家》入面卻顯出他的另一面，到底私底下的王俊棠是怎樣的爸爸？東泰說：「細個時我爸爸好忙工作，我比較少見到佢，大家見佢個樣都知佢幾惡，所以細個好怕佢！」隨住慢慢長大，兩仔爺相處愈來愈似朋友，王俊棠放下惡相不時講「爛GAG」，令全家人氣氛都好開心，東泰說：「佢爛GAG唔好笑，搞到成日都冷場，依家我同佢關係似好朋友，我自己喺屋企鍾意打機、睇劇，佢都唔會嘗試影響我日常生活，就算唔鍾意我打機，都唔會好嚴厲咁責怪我，所以相處得好舒服。」
兩父子十足朋友一樣，食蛋糕都玩到滿臉忌廉。(《晴報》圖片)
被爸爸熱情強吻，東泰表情好痛苦。（《晴報》圖片）
王俊棠大讚東泰夠靚仔，仲爆料話有好多女.....朋友。（圖片：受訪者提供）
王俊棠直言曾經用錯方法教仔女，現時兩個仔都長大，有個人思想都管不了太多，他說：「父子之間只是血緣關係，佢自己諗咩、想做咩係控制唔到，我呢個仔好開朗，好多女...朋友嘅，當然啦，靚仔嘛！邊個唔鍾意丫？佢點發展佢自己決定，我會留喺旁邊頂多叫佢操弗少少，得個高字，食極都唔長肉。」東泰17歲會考成績不理想，遇到無綫首次公開招募訓練班，爸爸又主動為他拿了報名表，所以他放手一搏決定試一試，有不少跑龍套的工作，後來他因為愛玩COSPLAY，入迪士尼扮公仔，不過『朱兒』個角色造型又熱又焗，於是他簽約模特兒公司，偶然都會返無綫拍劇，他曾經演過《愛回家》入面的「年輕版」大龍生，與爸爸同劇但沒有對手戲。東泰說：「細個覺得爸爸係演員好煩，因為個個同學都追問，我唔會唔認爸爸咁衰，不過就叫大家唔好問，自己睇電視，睇到咩就咩啦，我好怕麻煩，所以有少少唔想佢去我家長日。」棠哥稱以前路過，街坊都指手劃腳罵他是奸人、壞人，但近年因《愛回家》而「轉性」，人人路過都笑笑口打招呼說：「池富，你演得好好呀！」
東泰在無綫拍過不少劇集，希望步爸爸後塵做一位出色的演員。(圖片：受訪者提供)
王俊棠表示對住兩個仔不會偏心，大仔已經35歲，有自己的家庭和事業，細仔陪他同太太住，屋企就熱鬧一點，他說：「佢係乖仔，我剛剛過生日，佢封利是畀我，500蚊呀！」身旁的東泰尷尬笑罵爸爸為何將金額講出口。問到父親節如何慶祝？東泰稱收工後約爸爸食飯，棠哥即時甜在心頭：「我鍾意食日本菜！」
拍攝當日，大家驚喜地為棠哥送上生日蛋糕補祝生日，棠哥即時錫錫太太、東泰和劇中囡囡鍾凱琪，成班大細路將忌廉塗上棠哥的臉上，非常融洽。棠哥見到太太即時撒嬌稱拍攝劇集《唐人街》時雙手打到瘀傷處處，太太即時肉赤錫錫安慰，此時的東泰立即打冷震稱要離場，棠哥說：「佢就算喺屋企一見到我哋兩公婆恩恩愛愛就頂唔順行開，衰仔唔識學野，男人最重要係老婆開心，見到老婆笑最好！」
王俊棠是好好先生，跟太太多年來都非常恩愛。（《晴報》圖片）
棠哥私底下幽默風趣，跟劇集中的大奸角截然不同。(《晴報》圖片)
大家一齊為棠哥慶生，非常熱鬧。（《晴報》圖片）場地提供：龍袍（灣仔港灣道30號新鴻基中心2樓2C及2D號舖）