香港電訊5G科技嘉年華開幕 互動展覽體驗智慧生活

科技發展日新月異，黛安噚日就去咗啟德郵輪碼頭，參加香港電訊5G科技嘉年華開幕禮。裏面嘅高科技展品，令黛安大開眼界，仲以為自己去咗未來世界。一連4日嘅嘉年華有展覽同互動展區、噚日同今日就有座談會、聽日（15號）仲有演唱會！大家更可以睇到5G科技點引領香港同大灣區市民邁向更高智慧、更安全同更健康嘅生活方式。

黛安知道，展覽區劃分咗7個核心主題，包括5G及智慧城市、企業方案、金融科技、全球網絡、革命性生態系統、流動方案及智慧生活。喺5G及智慧城市展區裏面，會展現有關5G科技及網絡連接、VR或AR應用、智慧城市嘅裝置等；企業方案展區嗰邊，就有智能零售、人工智能、縱數據分析加速智慧城市同大灣區發展嘅裝置展出。

展出金融科技 智能消費

至於金融科技展區，就可以見識到流動支付、商戶電子支付方案等；行到去全球網絡展區，就可以了解到數碼平台方案、網絡及數據保護嘅資訊；而智能消費生態系統變革展區，就有關於電子商務、旅遊3.0等資訊；流動方案展區就會展示5G智能手機、電子競技等展品；而智能生活展區更可以了解關於家居自動化嘅科技品，例如物聯網（IoT）、多媒體生活通訊服務等。

香港電訊集團董事總經理許漢卿致辭時就話，5G會成為香港嘅基石，亦係持續發展香港成為智慧城市不可或缺嘅一部分。佢仲話︰「作為一家領先嘅資訊及通訊科技服務供應商，香港電訊好榮幸能主辦呢個嘉年華。香港電訊亦有信心，喺所需嘅生態系統就緒時，有能力喺香港推出優質嘅5G服務。」佢仲話，希望喺不久嘅未來，當5G及其他新興技術能讓人們享受更智能化及綠色嘅生活，及讓企業改善效率和客戶體驗，最終可提升每個人嘅生活質素。