《愛回家之開心速遞》入面除了熊家有熊樹根（劉丹飾）這位好爸爸之外，其實他的死對頭池富一家三口，都經常鬧出不少笑話，池富（王俊棠飾）、池子孝（阮政峰飾）和池美麗（鍾凱琪飾）三人都性格市儈又貪心，做出很多搞笑又無知的行為，加上美麗超級為食，更令池家經濟百上加斤。剛好父親節就快到，池美麗主力邀請爸爸池富去飲茶慶祝，雖然哥哥池子孝太忙沒辦法出席，不過現實生活中王俊棠的囝囝王東泰就有現身，另類的一家融洽。美麗說：「《愛回家》播出兩年幾以來，除咗好多謝愈來愈多人認識我之外，我好開心認識到阿爸，亦即是棠哥王俊棠！戲裡戲外佢都帶我周圍食好嘢，見到阿爸就有好嘢食，永遠唔怕餓親，連我日本朋友嚟到香港，佢都請埋佢食嘢，收工又會車埋我返屋企，咁好嘅阿爸邊度搵？」
一CLICK即睇：
鍾凱琪戲外都會稱呼棠哥為「阿爸」，關係要好。（《晴報》圖片）
池富、池子孝和池美麗一家三口，為《愛回家》帶來很多歡樂。(圖片：鍾凱琪IG)
鍾凱琪是單親家庭成長，一直都是跟媽媽相依為命，或者「池富」正好填補她心中缺乏的「父愛」，而王俊棠剛好兩個孩子都係兒子，多添一個乖女，又是另一種感受，棠哥笑言近來被稱呼為「美麗的爸爸」，他大讚這個女兒說：「美麗最可愛係佢好乖、好孝順，以往我如果有份參與演唱會，佢都即刻買飛支持，帶阿媽嚟睇，佢阿媽鍾意咗我......呢類唱歌嘅人，陳浩德、方伊琪等等，佢都會買埋張飛陪阿媽睇，唉......如果我個仔咁講就好喇，平日搵兩個仔飲餐茶都難呀！」棠哥對美麗讚口不絕，惟一不足的是她重色輕父，他說：「佢係日文老師，又成日去日本，好多《愛回家》劇組工作人員問日本旅行資訊，仲幫大家安排好，美麗仲識得煮飯，不過只係煮畀日本仔食，唔煮畀爸爸食。」他主動關心美麗的感情生活，追問曾經見面的日本男生是否男朋友，美麗說：「唔係，我單身，有冇好介紹？」
池美麗為食，私底下鍾凱琪同樣都係為食妹，同棠哥飲茶自己都食唔停。（《晴報》圖片）
每次棠哥有演出，鍾凱琪都會抽空支持，非常有心。(圖片：鍾凱琪IG )
戲裡戲外，美麗都非常感激棠哥的照顧，棠哥無論人生或演戲的經驗豐富，令她獲益良多，她說：「阿爸教我好多，初初拍《愛回家》嘅時候講對白太快或者太高音，佢會提點我，有時仲會演一次畀我睇，有一場係Terry同金城安同場，我要嗲聲嗲氣咁求佢哋，做幾次都唔太得，阿爸即場示範畀我睇，所以喺佢身上學好多嘢！」她大讚棠哥是面惡心善的人，有時候開玩笑完，到最後都默默為別人好，有次棠哥知道她要上網幫媽媽撲演唱會門票，他二話不說幫她搭路購買，令她非常感動，她說：「雖然機會唔大，不過他朝一日我結婚的話，阿爸你一定要坐主家席，我一定會斟茶畀你飲！」
一年一度父親節，美麗向池富撒嬌，認真甜蜜。(《晴報》圖片)
兩父女由拍劇到拍廣告都形影不離，棠哥走在路上總是被問起「美麗」，對於早前美麗在劇中力追金城安而被網友攻擊，身為阿爸的棠哥都似乎非常生氣，他說：「呢個世界邊個唔畀人攻擊呀？不招人妒是庸才，攻擊是因為吃不著的葡萄！唔使驚，有我在！」對於棠哥這番說話，美麗都大為感動，即時夾點心給棠哥食，又話：「阿爸！父親節快樂！」
父親節，當然少不免一家團聚，池子孝雖然未能現身一家人一齊歎茶，不過就非常有心思，拍了一段搞笑短片賀棠哥，他搞笑話：「今晚食豪啲，怕貴就唔好帶美麗去喇，等我返嚟兩仔爺一齊去大排檔啤啤佢，父親節快樂！」
阮政峰未能一齊請棠哥飲茶，拍片表達心意，超搞笑。（《晴報》圖片）
池氏一家戲裡戲外都好有愛。(圖片：鍾凱琪IG）
鳴謝場地：龍袍（地址：灣仔港灣道30號新鴻基中心2樓2C及2D號舖）