父親節將至，《晴報》將會為大家一連五日訪問電視熒幕下的好爸爸，好多男藝人顧工作、顧形象，很多時候都未能抽空陪伴家人，但今次五位好爸爸，不單將事業、家庭照顧好，連仔女們都力讚他們是好爸爸。
第一位介紹的當然是德高望重的大龍生......不，應該是羅樂林先生。羅樂林在處境劇集《愛回家之開心速遞》中飾演富豪爸爸龍敢威，除了有三名太太外，還有不少年輕的女朋友，「已知」的仔女合共6個，分別是龍力蓮（林淑敏飾）、龍力王（李偉健飾）、龍力士（鄭世豪飾）、龍璟風（陳浚霆飾）、龍作蜜（何艷娟飾）和Joe（未現身），他經常周旋在幾位爭寵的太太和爭產的子女之間。
《愛回家》入面大龍生家族龐大，不過面和心不和，經常鬧出不少爭寵笑話。（圖片：鄭世豪IG )
大龍生二房跟大房經常為爭奪繼承人而鬧交。(圖片：鄭世豪IG)
現實生活中，羅樂林有三位寶貝女兒，SaSa、Adrienne和Tisha（羅苡之），他直言雖然角色上經常都重男輕女，但現實生活中，他絕對是個合格的爸爸，羅樂林說：「我覺得自己算合格，我同三個女感情好好，為咗佢哋所有唔好習慣都戒咗，我戒咗煙，又唔再打麻雀，戒咗差不多都30年，最多就係同一家人飲吓酒。想當年，我啲女經常會帶同學返屋企玩，我會親自下廚煮埋畀佢哋食，算唔話得啦！所以，囡囡班同學長大之後，有時外國返港都會同我飲酒聚舊，大家關係好似朋友一樣。」
羅樂林同三個囡囡關係要好。（圖片：羅樂林女兒 Adrienne IG)
羅樂林的頭兩位女兒是與第一段婚姻的太太所生，隨後跟陳寶儀結婚誕下Tisha，Tisha跟同樣是演藝圈的陳志健結婚，故特別為人熟悉，他說：「我對三個女都絕無偏心，佢哋都知道，佢哋都感受到，從來冇詐型！」他直言因為三位都是前世情人，所以起初她們拍拖時都特別著緊，現在回望過去，羅樂林說：「其實都唔知緊張啲咩？其實做爸爸嘅別無所求，仔女開心最重要！」羅樂林曾經在訪問中提到，跟陳寶儀早已離婚，但一直同住，互相照顧，兩人都經常出席家庭聚會，保持家庭的完整。雖然明知道拍劇辛苦，羅樂林的囡囡都尊重爸爸的意願，他說：「雖然知道我辛苦，但其實佢哋好習慣我呢種生活模式，可能有時會忙，唔得閒食飯，就算遷就我工作，我都成日同佢哋講，就算大時大節，囡囡工作最重要，節日慶祝呢啲遲啲補祝都得啦，無所謂！」
羅樂林雖然平日工作忙，但都會抽時間照顧家庭。（圖片：羅苡之IG )
一家人經常都會食飯見面，關係好好。(圖片：羅苡之IG）
三個女為羅樂林舉辦驚喜祝壽派對，認真SWEET！(圖片：羅苡之IG）
羅樂林去年70歲大壽生日，三個囡囡特別為她製造驚喜派對，瞞著他相約幾十位爸爸的好友到場，羅樂林去到餐廳，門一打開，實在驚喜非常，他說：「呢次絕對係我71年人生以來最驚喜一次，佢哋竟然約晒我最好嘅朋友，仲要全部人一齊瞞住我，實在太開心，所以幾個女真係好乖，好錫我呢個爸爸。」
對於三個女為自己炮製驚喜，羅樂林非常難忘又感激。(圖片：羅苡之IG )
連爸爸圈中好友蔡少芬都靜靜雞請來，認真有心。（圖片：羅苡之IG )