蔡少芬（Ada）同老公張晉近日參加內地真人show節目《我最愛的女人們》，不時大放閃光彈，非常恩愛。近日蔡少芬好友陳法蓉作客最新一集。好姊妹見面無所不談，陳法蓉仲大爆當年蔡少芬曾一度想將張晉介紹畀其他好朋友，而喺陳法蓉心入面，一直有個隱藏咗11年，關於蔡少芬嘅心結，期間陳法蓉仲講到爆喊！
(陳法蓉作客《我最愛的女人們》)
陳法蓉一開始就大爆當年蔡少芬同張晉一齊之後，因為各種原因，都有猶疑過應唔應該同佢繼續行落去，一度想將張晉推介畀其他女仔。蔡少芬聽到好朋友咁講，仲好興奮咁直認不諱，搞到張晉即時嬲嬲豬，望一望老婆，蔡少芬先醒目收番笑容，場面認真搞笑！
之後陳法蓉又講到，同蔡少芬識咗咁耐從來冇嗌過交，最令佢記憶深刻嘅一次衝突，就係11年前蔡少芬結婚當日畀佢鬧爆，令陳法蓉耿耿於懷。當時蔡少芬同張晉結婚想低調進行，但陳法蓉揸車去婚禮會場，唔小心畀傳媒跟蹤，最後引埋啲記者到婚禮，搞到蔡少芬好激氣，即時大發雷霆，發火鬧爆好友：「無將佢哋甩開咩？真係無用！」講講吓舊事陳法蓉更於節目爆喊，哽咽：「嗰次係我識你咁耐，第一次聽你咁大聲同我講嘢，所以我記到而家。」陳法蓉當時因為唔想破壞好姊妹大好日子，所以死忍繼續參加婚禮，點知一忍就忍咗11年！蔡少芬聽完都有安慰番好朋友，解釋當時因為外界嘅人唔睇好佢同張晉嘅婚姻，指佢「嫁畀窮小子」、「女尊男卑」，搞到佢好大壓力，所以先會一時之間控制唔到情緒，向陳法蓉發脾氣。講完心事，陳法蓉一解內心鬱悶，即時笑番，同蔡少芬姊妹情依舊不變呀！
(講講吓舊事陳法蓉爆喊)
(蔡少芬同陳法蓉相識多年，感情深厚)
蔡少芬張晉結婚11年 苦盡甘來
蔡少芬同張晉呢一對，2008年結婚，育有兩名女兒張楚兒同張信兒，成為幸福一家四口，又不時公開放閃，絕對係娛樂圈公認恩愛夫妻，不過佢哋一開始並不被外界睇好，事關剛開始拍拖時，蔡少芬已經喺香港同大陸好岀名，但張晉仲係寂寂無名，甚至連電影都接唔到一部，收入甚少，算得上係窮小子。不過蔡少芬堅定相信張晉係好有潛質成為好演員，只係差機遇，又不時公開讚張晉，努力維護呢段感情：「我相信佢會出人頭地，因為我覺得佢係一個好叻嘅人，只要搵到一個伯樂，佢肯定可以將佢嘅本領都拎岀嚟畀人欣賞到。」
蔡少芬嘅鼓勵同不離不棄，令張晉信心大增，亦更努力演好每個角色。其後張晉事業亦愈來愈好，2014年更憑《一代宗師》奪得金像獎最佳男配角，之後電影仲一部接一部，張晉實力已經備受業界肯定。現時提到張晉同蔡少芬，已經好少人再講佢哋「女尊男卑」啦！而對蔡少芬嚟講，張晉最好嘅地方，係完全接納佢嘅過去，呢點最令佢感動，她說：「所有我以前嘅過去，佢完全地可以接納，佢都完全不會有一啲異樣嘅眼光去睇我，反而係完全保護我，所以我真係很感激佢。到咗而家，無論大事小事，我覺得有佢嚟幫我分擔，我就好安心，完全唔會有壓力。」
(蔡少芬不時大曬家庭樂)