西九自由空間下月啟用 全港最大黑盒場地開Show

唔少香港人期待已久嘅西九文化區藝術公園，終於下月啟用啦。黛安知道，造價約12億嘅藝術公園，樓面面積達4,424平方米嘅表演場地自由空間，分「大盒」、「細盒」、「盒仔」同「Livehouse」，仲有戶外藝術公園。其中「大盒」有678平方米大，即係大約7,300呎，樓高更有10米，係全港最大嘅黑盒劇場之一，聽聞已有逾10個藝術表演節目排住隊上，包括法國五月、非常林奕華等，今年嘅檔期幾乎全滿。

黛安噚日有幸去參觀，見到「大盒」嘅懸掛裝置比其他劇場靈活，觀眾席可按不同表演改動，容納到450個座位或900個企位。西九管理局行政總裁栢志高話，6,000蚊可租9個鐘，9,000蚊更可租14個鐘，以新場地同獨特性嚟講，價錢好合理；租用嘅團體會似戲曲中心咁同西九就票房分帳，未來會考慮提供租金資助。

至於154平方米（約1,657呎）嘅「細盒」，係多用途活動廳，適合搞展覽、小型聚會；而「盒仔」就有70平方米（約753呎），可做演出綵排、工作坊等。自由空間正門仲有個融合酒吧同咖啡廳嘅Livehouse，今年夏季開放，定期會有現場音樂表演，而行出去就係大草地，望上去自由空間嘅外牆，有戶外投影屏幕，未來可能放映電影。西九管理局董事局主席唐英年話，大家喺呢度可享受文藝節目，放慢生活節奏。

黛安聽城市當代舞蹈團行政總監黃國威話，已簽訂「大盒」場地3年交流協議，每年有兩星期租期演出，比起租康文署會多1星期，可以嘗試唔同藝術演出。