facebook 6.5萬呎新Office 大玩香港元素

facebook香港新辦公室噚日開張，黛安當然要去祝賀佢哋喬遷之喜，新辦公室位於鰂魚涌，共有4層、總面積約6.5萬平方呎，唔少地方都滲入了香港的文化元素。

進入辦公室，首先見到牆上色彩繽紛嘅壁畫，黛安聽公關姊妹講，原來係由本地藝術家Zoie Lam創作，展示以香港為原型嘅幻想世界，辦公室內另有3幅本地作品，且多間會議室均以本地事物甚至潮語命名，好似電影《無間道》，經典對白「怯，你就輸一世」等。接待處後面有一間Secret Room，裏面似足香港夜景，有五光十色嘅霓虹燈裝置，大批記者都忍唔住即刻「打卡」！

行入啲，見到佢哋嘅「樓上食堂」，參考大牌檔同流動小販設計，全天候免費為員工提供早午餐同各類點心飲品，包括燒賣、奶茶等，而且各層亦有迷你廚房，杯麵汽水員工自取，保證一班員工唔會餓親。穿梭唔同樓層，仲會見到好多設施畀員工放鬆身心，好似可以入去遊戲室玩桌球、籃球同遊戲機，玩完可以用按摩椅鬆下，仲可以喺公共空間望住海景同同事傾偈，真係羨煞一眾嘉賓。

新辦公室設有Live Studio，提供多款專業影音設備，fb員工同夥伴可以進行直播或錄影，場景中同樣融合香港面貌，猶如置身舊式冰室一樣。facebook大中華區總裁梁幼莓話，未來會加強投放資源作數碼發展，並推出新活動，邀請用戶提交自己嘅故事，詳情稍後喺fb香港專頁公布。