海洋公園暑期動物體驗營 零距離學做護理員

話咁快，暑假又快到，各位家長為小朋友準備好節目未呢？未嘅話不妨考慮下海洋公園學院即將推出嘅全新夏日歷險，就係2019年「暑期動物體驗營」啦！黛安知道，體驗營可以畀4至11歲小朋友透過同動物零距離接觸，例如餵飼鯊魚、鯆魚；探訪海獅，再配合藝術創作、小組任務同探索小挑戰，啟發佢哋嘅好奇心、保育意識等「4C」能力，發揮潛能，依家報名仲有早鳥優惠！

聽公關姊妹講，今次由香港海洋公園學院舉辦嘅暑期動物體驗營，節目相當豐富，當中仲有為唔同年齡嘅小朋友分為5個級別，包括有2個專為4至5歲幼童而設嘅「童遊探索隊」、2個為6至8歲兒童準備嘅「樂遊探索隊」，以及1個為9至11歲小朋友而設嘅「漫遊探索隊」等，各自透過唔同設定，畀各位小小參加者有機會親身同園內嘅唔同海陸空動物大使見面，餵飼鯊魚、水母、珊瑚魚；探訪海獅、海豹、企鵝等。

除此之外，唔同年齡嘅小朋友，仲可以跟據相應組別同能力，化身成調查員、探索隊員等角色，解探海洋生物習性與自然環境嘅關係，參與構思互動劇場、合力設計攤位遊戲，或者完成小組任務挑戰等，以親身體驗方式啟蒙小朋友主動學習，加強解難能力兼展現個人藝術天賦，好玩、多元化之餘，亦可藉此啟發大家嘅好奇心、保育意識、個性發展同與大自然聯繫嘅「4C」能力，自然比一般課堂更加有趣味！

黛安知道，7至8月嘅暑期課程由即日起接受報名，下星期三（22日）下午3時59分前報名仲可享早鳥92折優惠，詳情可以瀏覽https://www.oceanpark.com.hk/tc/education-conservation/education/summer-adventure-2019，或致電3923 2323查詢。