《愛回家之開心速遞》近日劇情愈做愈有，池美麗（鍾凱琪飾）在劇情中癡戀金城安（周嘉洛飾），更不顧安仔已經有女友Bonnie（林凱恩飾）而窮追不捨，最終她同安仔因意外被困山泥之中，並將身上所有的食物都留給安仔，令安仔心入面非常感動。沒想到劇集播出後，網友反應非常強烈，部分人支持美麗追求真愛，又有部分人指嘔心拒絕追看。（相關新聞：http://bit.ly/2VDlxEx）鍾凱琪當然都有睇到大家的留言，她事後直言不開心，她說：「冇諗過大家會有咁大回響......雖然收到你哋各方面支持嘅留言，但見到海量般負面的評論，坦白講真係有啲唔開心。( 我都算係平常人，正常人畀人話嘔心，點都會有失落。)」
美麗在劇中明知安仔有女朋友Bonnie，仍然窮追不捨，觀眾睇到好激動。(圖片：鍾凱琪IG）
安仔突然情陷三角戀，網友狂鬧池美麗。(圖片：林凱恩IG)
她表示為了今次的負評，甚至會自我質疑，她說：「『是否我做得唔夠好？』、『是否我的出現真的拉低了劇集嘅質素？』...看到有人叫我退出劇組，或者會因為我嘅出現而可能選擇棄劇。 個人嘅感覺真係唔好受。 但哭過、痛過、悲傷過後，總要面對現實。香港精神， 面對困難絕不可以逃避。 不能逃避就只能勇往直前。我記得我都曾經多次提及，我冇能力令全世界人都喜歡我。但係只要有一個人願意留意我。我都好樂意為嗰個人付出同努力。」鍾凱琪表示希望將來可以慢慢進步，更自嘲說：「大家繼續如此討厭下去，到年尾我是否有資格競逐『最厭惡角色演繹大獎』？可能對於很多人來說，池美麗係一個電視上唔討好嘅角色。但係對於我本人嚟講。佢係我人生一轉列(捩)點，佢令到大家認識我。 佢實現了我多年嘅夢想。」
美麗直言為大家的留言感到不開心。（圖片：鍾凱琪IG)
見美麗咁長篇留言，感受到她真的受傷了，不少網民都留言安慰她，又指馬蹄露當年《真情》演May May的角色情況一樣，網友說：「廿幾年前馬蹄露被人全城鬧爆，唔係因為個樣，而係演技太好，將May May的乞人憎性格同行為演活。《真情》的May May，全球廣東話華人冇人唔識佢，過咗咁耐仲有人記得May May呢個角色，今次你比人全城鬧爆，證明你將池美麗角色發揮得淋漓盡致。」同劇的梁証嘉和鄭世豪都留言替她打氣，而其他網民都紛紛開解她，內容如下：
「有用心做到自己喜歡的事已對得起自己，人生就是如此」
「美麗角色唔討好，但證明你演技過關啊！加油啊！！d人劇同現實分唔清，無辦法！仲有，我覺得你把聲好好聽啊，總之就加油啦！！」
「其實我覺得你個角色幾可愛呀~~ 好溫柔體貼 又善解人意 係大食左少少啫。我幾鍾意你個角色~ 不過講實話 sad but true 始終呢個社會都係接受唔到肥妹，我都係肥妹，大家一見到我咁既身材已經係到取笑我，成日比人歧視，根本冇人會了解清楚你既為人同埋內心，如果你呢個角色係由一個瘦既女仔做，擺明都冇人會話個角色噁心啦... 呢樣香港人既價值觀就改變唔到架啦，我覺得要與歧視共存，唔緊要啦，心廣體胖~ 自己知道自己做緊咩就好！」
「呢個角色無人代替到你的，加油！支持你！」
其實美麗在劇中一向都是「花癡」角色，跟不少同劇的男演員都有演過幻想或者事實的感情戲，當中包括阿壯（招皓軒飾）、朱凌凌（吳偉豪飾）、鐵面陳（王致狄飾）、秦博思（馬貫東飾）等等，她都曾經意圖想介入博思同Mandy（謝芷倫飾）之間的感情，可惜不得要領，最終轉投其他男士。
阿壯曾經跟美麗擦出過丁點愛火花。（圖片：鍾凱琪 IG)
美麗現時鍾情金城安。（圖片：鍾凱琪 IG)
其實，美麗都曾經迷戀過博思。（圖片：鍾凱琪 IG)
她曾經想介入博思和Mandy的感情。（圖片：鍾凱琪 IG)
安仔為了推走美麗，一度安排朱凌凌同美麗約會。（圖片：鍾凱琪 IG)
連鐵面陳都新娘抱過美麗。（圖片：鍾凱琪 IG)