《愛回家之開心速遞》女神榜冠軍得主群姐（許思敏飾）在劇中一直視歐陽波比為偶像，更為見對方瞓身換領見面會的入場劵之餘，更為了一位貌似歐陽波比的網友而幾乎誤墮網絡陷阱。雖然「歐陽波比」名字較玩味，但的確歐陽震華（Bobby）的肖像經常都在不同形式上亮相過， 包括一比一的人形紙牌，令他不知不覺間成為《愛回家》的一分子。許思敏早前接受《晴報》訪問時表示好希望跟對方合作，而歐陽震華拍片為思敏打氣時，都表達心意，希望有機會在劇集中客串，跟「群姐」做對手戲。（相關新聞：http://bit.ly/2GTiIXR）
歐陽震華為《晴報》拍片不忘向思敏打氣加油。（《晴報》圖片）
劇中不時有歐陽震華的肖像亮相。(圖片：《愛回家之開心速遞》截圖)
「機會終於嚟喇，飛雲！」Bobby在微博上載兩張合照，並留言說：「我和許思敏終於合作！」合照中，見到許思敏笑到見牙唔見眼咁，一定非常開心，而另一張係思敏用雙手搣Bobby塊面，似乎見到偶像特別肉緊，不過點解唔係獻吻呀？兩張相出街之後，網友紛紛激動留言說：
「開心速遞！！！！多客串幾集吧！」
「伊莎貝拉群姐，終於見到他的偶像了，哈哈」
「我的天啊！！好期待！歐陽波比和群姐終於要合體了！」
「群姐的追星路好順利啊，還可以摸偶像臉！」
雖然之前在不同劇集都合作過，但《愛回家》之後，總算係一圓「群姐」美夢，世紀合體。(圖片：歐陽震華微博)
群姐認真大膽，竟然出手搣偶像的面珠。(圖片：歐陽震華微博)
不過，大家興奮熱烈討論之際，其實有一件事已經睇得出今次他們的合作並非拍《愛回家》，大家見到群姐身上所穿的並非「接龍集團」的招牌黃色風褸外套，所以網友一眼就睇得出不是《愛回家》的劇情。《晴報》致電歐陽震華回應，經理人親口否認是拍劇，原來他們為一個商場拍攝母親節特輯，片中群姐的名字叫「勤姐」，母親節以為被子女離棄，惟有攬實歐陽波比的人形咕𠱸解愁，除了夢中見到他邀請共舞之外，在商場中竟然真的偶遇男神歐陽波比，波比即時獻花給她，更搞笑說：「你個仔喺度，冷靜啲，含蓄啲，抹返啲口水先！」認真搞笑。不過今次「合體」始終不是清潔工群姐，所以《愛回家》迷一於繼續期待，希望《愛回家》監製知道，即刻安排Bobby客串啦！
群姐的工作服明明是黃色風褸，所以大家一睇就知唔係《愛回家》劇情。(圖片：《愛回家之開心速遞》截圖)