型黑別注版八達通 下周一登場

黑色，可稱得上係時尚型人嘅代表顏色，黛安都特別鍾意！但除咗衫褲鞋襪外，有無諗過連八達通都可以型埋一份呢？八達通宣布，由下星期一開始，推出全新「型黑‧別注版八達通」，成張卡將以型格黑色為主色，配埋半透明嘅設計，新標誌更鮮明突出，型格之餘，亦盡顯尊貴時尚品味！

黛安知道，呢張咁型嘅成人版八達通將由下星期一（15日）起，喺全綫港鐵客務中心同八達通網上商店公開發售，每張售價港幣88蚊，不設按金同儲值額。帶住佢出街，型人指數即時急升！大家記住唔好錯過喇。