盈盈樂樂交配期結束 海洋公園大熊貓展館重開

早前海洋公園為咗迎接大熊貓盈盈同樂樂一年一度嘅繁殖季節，將園內「大熊貓之旅」展館暫停對外開放。小倆口嘅繁殖季節喺前日已經完咗，海洋公園宣布展館噚日起重新開放，大家可以去海洋公園探佢哋喇！

海洋公園動物及保育執行總監布文傑話，3日嘅交配期，公園觀察到兩隻大熊貓有8次共處，試過自然交配，可惜唔成功，由於雌性大熊貓發情高峰期只有24至72個鐘，公園同埋中國大熊貓保護研究中心團隊，採用樂樂嘅精液為盈盈進行咗3次人工授精，增加盈盈嘅受孕機會，未來會繼續觀察盈盈身體狀況。

專程嚟香港協助大熊貓成孕嘅中國大熊貓保護研究中心科學研究與動物管理處負責人凌珊珊就話，如盈盈成功受孕，荷爾蒙水平同行為變化等懷孕迹象，預計最快會喺今年6月下旬出現，但呢啲迹象都可能係假懷孕。公關姊妹同黛安解釋，大熊貓嘅懷孕期長72至324日不等，不過要等BB出世前14至17日左右先可透過超聲波偵察確認大熊貓係咪真懷孕，黛安都好希望快啲收到好消息！