41歲的楊卓娜（真名：楊娜）是楊怡的家姐，不過大家相信對她最有深刻印象，除了她演活了《愛回家》霞姐一角，還有她偉大後母這個身份。自從2009年嫁給早年喪妻的老公後，她就將繼女舒婷和舒雅視如己出，同年誕下細女，楊卓娜特意改名舒然，代表3女無分彼此。近日有記者拍到母愛泛濫的楊卓娜帶任職秘書的大女去美容院變靚，情同姊妹；而她就做了5小時暖宮療程，包括焗艙、按肚、針灸、敷藥，被揭原來想追仔！雖然楊卓娜曾講到明年紀大，加上鍾意女，所以不想追多個，不過知道奶奶與老爺很心急想添丁，楊卓娜決定聽話做好新抱，積極保健。
其實楊卓娜真是「唔話得」，為了3個女仆心仆命多年，密密拍劇賺錢之餘，對家庭都好大付出，不用開工時會分別抽時間陪伴她們，教好3個女。不過楊卓娜就話，其實是女兒教好了自己。
捱足17年因女兒拯救人生 狂進修變十項全能
楊卓娜於23歲參加完香港小姐後加入TVB，可惜演藝路一平都平平無奇，沒有出名的代表作。當時楊卓娜不習慣面對鏡頭，覺得自己不是做演員的材料，更加不是屬於這行業，所以一直對未能投入拍劇，渾渾噩噩好多年，浪費很多機會。相反細妹楊怡於同期已經成為一線花旦 兩姊妹星途發展很懸殊。去到2009年誕下細女之後，楊卓娜突然醒覺，認為自己做人媽媽要做好榜樣，要有人生目標同興趣，做任何事都要全力做到最好，她說：「有咗小朋友之後就有人生目標，覺得做嘢需要努力！拍戲已經變咗我嘅興趣，排名唔係咁重要，最重要係劇本、角色好，同埋有觀眾支持。」由於心態上有所改變，楊卓娜的運氣慢慢變好，先於《公主嫁到》接到一個戲份頗重的女配角，成功受到觀眾注視，後來連續2套處境劇《誰家灶頭無煙火》和《愛回家》的演出都很突出，人氣開始上升。直至《全職沒女》，楊卓娜更加大膽以三點式泳衣視人，因為身材keep得好好，網民都大讚她很有人妻feel，捧做女神，17年來終捱出頭。
一方面要在女兒面前打好自己份工，另一方面楊卓娜都積極進修，等自己親自為女兒上興趣班，打成一片。楊卓娜自小就很愛閱讀，會偷看放在媽媽床頭的武俠小說、推理以至文藝小說，所以小時候會走路上學，慳車錢用來買書，細讀過大量名著和小說：「嗰時物資有限，我好珍惜每一本書並會重讀，因為讀咗好多台灣嘅文藝小說，認識大量詩詞，令我中學嗰陣都好鍾意中國文學。」除此之外，楊卓娜入行時已開始投入做手作，陪伴自己度人生的低潮，故縫製公仔、樹脂黏土樣樣精通，手藝能媲美專業級導師。近日楊卓娜不但探訪譚寶碩老師的書畫舍學書法，又重拾20年前的芭蕾舞興趣，見她筋骨好軟，似乎有一定舞蹈底子。
3大方法教好親生女繼女
1. 慢慢溝通取代打鬧
大女早熟，很快就有拍拖對象，當時楊卓娜與老公都有出聲，卻產生不少爭執，令楊卓娜學識如何同女兒溝通：「大女試過有段時期唔相信父母，我哋唔想佢咁早開始拍拖，人選亦唔適合，爸爸呢方面好嚴厲，好驚個女學壞，成日唔畀佢同男仔出街，傾又傾過，打罵都試過。小朋友愈大遇到嘅問題愈多，佢哋開始有自己思想，唔會聽你支笛，我都係邊湊邊學。」
2. 要求女兒做好學生本份
雖然香港讀書壓力好大，不過楊卓娜認為就算不求高分，3個女兒都不應逃避讀書，反而要做好學生的本份。一旦女兒不聽話，楊卓娜就會加重練習，希望她們明白責任心問題：「叫親佢做硬係唔做，咁就懲罰性，『一份你唔做，咁做兩份啦！』就算依家都係㗎，佢唔交齊啲嘢畀我，我要佢畀double，再唔交就triple。」大女初初很反叛，如今都知道楊卓娜的苦心：「我知媽咪為我哋好，畢咗業出嚟做嘢之後，比較自己同同年紀嘅人，大家喺待人接物上有分別，可能佢哋被父母縱壞咗，我就知道父母當初咁做係有原因。」
3. 做家務訓練獨立
楊卓娜對於細女都好嚴厲，有時放工回家都叫她斟水，食飯會叫她盛飯，想她透過做家務自幼訓練獨立性：「細個幫我哋做家務，小朋友會覺得係件樂趣事，大個唔會抗拒，工人放假佢都會分工合作。」見到女兒懂得自己編排時間，主動做功課及溫習，又會幫手做家務，代表讀書同自理能理都無問題，做媽媽自然很安慰。
睇完覺得10項全能的媽媽有點嚴厲，不過成功教得出生性女，證明楊卓娜多年來付出的真心和誠意沒有白費。二女、大女就話一家人相處的很融洽，十足十親生：「媽咪一直視我為己出，唔會只對親生好，我同二妹都覺得好warm，有返媽咪愛錫。」，認真溫馨。