港燈「智惜用電生活廊」 推動節能建智慧城市

政府近年大力推動創新科技，港燈同樣積極支持，繼年初推出「智惜用電服務」計劃後，「智惜用電生活廊」都已免費開放畀公眾參觀喇！黛安知道，位於上環水坑口街嘅生活廊前身係港燈嘅繳費中心，喺今年初完成翻新，生活廊有互動遊戲同STEAM工作坊等，利用多媒體同互動設施，仲有透過導賞團，向公眾傳達港燈嘅歷史同發展。

港燈董事總經理尹志田日前仲化身導賞員，親自接待加入咗港燈「綠得開心學校」計劃嘅其中兩間學校嘅中小學生，又參加咗一個STEAM工作坊，同學生們一齊合力製作風力發電機模型，同學仔參觀完之後都話，活動增進對可再生能源同智慧城市嘅認識。尹志田就話，希望用深入淺出嘅手法，帶出各種應對氣候變化嘅最新資訊。

樓高5層嘅生活廊，每層都有唔同主題，地下以「港燈．香港背後的動力」為主題，介紹港燈逐步以天然氣取代燃煤發電，減少碳排放同應對氣候變化，亦有關於港燈歷史、電力系統等資訊；一樓就以「可再生能源」為主題，展示唔同種類嘅可再生能源，仲有互動遊戲畀參觀者了解更多太陽能發電系統嘅基本資訊；二樓就重點介紹何謂「智慧城市」，睇得又玩得！開放時間係禮拜一至五上晝9點半至下晝5點半，大家可登入以下網址www.hkelectric.com/SPG預約導賞團。