洗碗洗極仲係油 強嫂教你4招天然去油除味法【強嫂家務小知識】

今日Happy Friday大家有冇出去食飯先？話時話平時喺屋企啲碗碟係邊個洗最多？話說有日喺屋企煮完飯，我Honey 強佬勁好死話幫我洗碗，話想答謝我咁多年嚟煮咗咁多餐好嘢畀佢食。我就梗係唔會客氣啦，俾個死佬知我平時有幾辛苦都好啊！

結果真係我意料之內啊！我個死佬好少做家務，一做就叫晒救命咁啊！佢問我點解洗極啲碗都係咁多油喎，仲問我平時啲油係咪唔洗錢！聽到呢到就真係激死我啦，我呢啲咁注重健康又點會落好多油丫！好明顯就係佢少洗碗啦！！

見到呢幕，我就諗起嗰陣Winnie教我洗碗嘅技巧！今次真係要教我個強佬(順便同大家再share下啦)

當年Winnie 教落，佢話如果碗碟太多油同太多汁，可以先用紙巾或者用過嘅保鮮紙抹咗面嗰層油，咁就冇洗得冇咁辛苦啦！抹完之後都仲係咁多油，可以再用熱水過一過！仲有啊，怕食物嘅味道殘留喺碗碟上面，可以用埋檸檬皮落水洗碗刷幾下，不過就未必可以去到油啦！不過如果大家唔想用洗潔精，又想環保啲，可以用熱水加梳打粉落去碗碟，出嚟個效果比起用洗潔精仲好啊！

過咗幾日之後，強佬照住Winne嘅洗碗秘笈洗碗，啲碗真係易洗好多！佢終於明白我平時做佢賢內助有幾咁辛苦，仲話會多啲幫我做下家務！各位姊妹，一定要將呢個小tips share 畀你哋個另一半啊！

{{hket:inline-image name="wash.jpg"}}{{/hket:inline-image}}

(嗚謝資深家務助理導師Winnie Cheung提供資料)

精選健康知識，盡在 Healthy Life 健康男女
https://fb.com/HealthyLifeExpress/