《愛回家之開心速遞》近日可謂頻頻都有爆笑位，琴晚「Hip Hop耆兵」一集相信都笑到好多觀眾肚都攣，話說熊樹根（劉丹飾）為了10萬獎金，龍敢威(羅樂林飾)為了贏過搶走他女人的Rapper，譚道德（陳榮峻飾）為了證明自己不是奄悶校長，夾埋陳師奶（孫慧蓮飾）一齊參加「香港齊Hip Hop」的比賽，後來因為陳師奶病倒，臨時臨急搵「填詞王」馬豹(黎彼得飾)加入，組成「大四喜」，沒料到現場改賽制要玩即興Free Style，主題是IG（Instagram），四人都對IG可謂一竅不通，但就為面子而生急才，即興唱出心底話。最正係個比賽拍攝一點都不馬虎，除了找來演員扮《中國有嘻哈》的評審之外，更有觀眾扮感觸落淚，即時笑到有腹肌。
大四喜以一身Hip Hop扮相出場，超級有型。(圖片：《愛回家之開心速遞》電視截圖)
大龍生貴為千億富豪，為了面子而走上舞台，好有型呀。(圖片：《愛回家之開心速遞》電視截圖)
譚道德一洗以往形象，唔知班學生會有咩反應呢？(圖片：《愛回家之開心速遞》電視截圖)
樹根叔一班仔女同孫都睇死佢，佢咩都唔理豁出去。(圖片：《愛回家之開心速遞》電視截圖)
豹叔笑稱是改詞高手，實質黎彼得卻是70年代真正填詞王。(圖片：《愛回家之開心速遞》電視截圖)
連觀眾反應都拍埋，真係好正！(圖片：《愛回家之開心速遞》電視截圖)
Rap歌一出，這個加起來278歲的組合大受歡迎，大家都話睇得好感動，雖然只是劇情，但Rap歌的內容卻是非常真實又有意義，講到只要有勇氣就唔需要怕失敗怕瘀，又講埋香港精神，最終除了熊家一家為根叔自豪之外，連帶香港觀眾都非常感動。TVB觀眾瘋狂在其Facebook留言「洗版」，要求他們正式出道做樂壇新人，又話要睇LIVE版本，大四喜咁受歡迎，唔知道編劇會唔會寫落去呢？
其中陳榮峻接受《晴報》訪問，他直言拍攝非常順利，他說：「我們拍攝之前一日去錄音，錄製差不多三小時，拍攝都好順暢，拍了兩至三小時就完成，對我來講，Rap梗係難，幸好有我太太，她陪我數拍子同練習，咁就表現得好少少。」峻哥表示好期待大四喜再次有表演，不過暫時就未有劇本寫到，問到會否獲邀登台？他笑言：「點會有人搵我哋四個老嘢去唱？我平日都好少唱歌登台，頂多做慈善會唱少少，估唔到大家咁鍾意大四喜。」他印象中歌詞是楊熙的作品，而填詞人黎彼得在現場有畀意見作修改，真正Rapper KT唐嘉麟就教他們一些技巧同動作，令整個演出順利拍攝。
譚道德Rap住鬧金城安，實在大快人心。(圖片：《愛回家之開心速遞》電視截圖)
足本歌詞如下：
「Hey 乜嘢叫做IG我哋唔知，我哋淨係知 企喺台上我哋可以，
有心唔怕遲，請你聽我哋講先，我哋有吉士，幾多歲都好都未會怕瘀。
Hey 乜嘢叫做IG我哋唔知，我哋淨係知，香港人乜都敢試，
獅子山精神，有乜嘢都要行先，聽我講埋先，肯Do喺香港實有發展。
Hey 乜嘢叫做IG我哋唔知，我哋淨係知 乜嘢做叫禮義廉恥，
四維唔伸張，國家就會係咁先。一味玩IG，一味講呢啲問你點知。
Hey 乜嘢叫做IG我哋唔知，我哋淨係知廣東話有好多意思，
廣府九韻玩落更加有拍子，一味ABC，一味講呢啲。
Yo，其實我哋大四喜乜嘢都知，所有潮流新事物，我哋乜都肯試，
人生流流長咁做先有意義，所有年齡層咁樣做先會啱Key。
Yo，其實我哋大四喜乜嘢都知，所有潮流新事物，我哋乜都肯試，
人生流流長咁做先有意義，所有年齡層咁樣做先會啱Key。」