連結地區文化 深度設計灣仔 體驗不一樣香港地

大家有無留意到灣仔港灣道消防局，呢幾個月換咗新裝，以生動嘅設計成為打卡熱點，商經局局長邱騰華仲不忘「抽水」，只有香港嘅消防局，有中英文對照，都係一國兩制嘅故事，亦都係「#ddHK設計#香港地」其中一個極具創意嘅內容。

黛安噚日去咗「#ddHK設計#香港地」，呢個由商經局主辦嘅宣傳活動，由地點到信息發布，都極具創意。地點係「親愛吃eat darling eat」，原來係邱騰華局長同太太兩星期前無意中喺銅鑼灣食飯時搵到嘅新餐廳，佢對裏面嘅食物讚不絕口，話食材喺古今中外crossover，黛安試過，果然不錯，可惜忙於工作，忘記影相，下次要自己再嚟幫襯。局長將發布會安排喺呢度，貫穿design thinking嘅神髓，抵讚！

聽局長講，「#ddHK設計#香港地」旨在以設計連結令香港人有共鳴嘅地區文化、例如用腳步帶旅客深度了解地道設計、以創意為引子體驗不一樣嘅香港地；今次喺灣仔鬧市中擺放設計作品，為社區注入創意氣息，都有佢嘅歷史因由。

灣仔故事由1840年代舊灣仔海岸綫出發，由南至北、東至西，貫通整個灣仔區。皇后大道東的原海岸綫本為香港原居民和漁民的祖住地，隨着不同時期嘅填海工程及城市發展，灣仔區逐漸向北伸延發展。而原來灣仔就叫下灣。灣仔同一代嘅香港人一樣，見證住香港由小漁村蛻變成國際大都會，所以挑選灣仔是十分合適嘅，佢亦不忘多謝灣仔區議會嘅全力支持。

聽香港設計中心董事會主席Eric Yim講，旅客可以喺灣仔從一個地點走到另一個，來回穿越皇后大道東，睇到新舊嘅街道生活、住宅和商業樓宇，以及過去和未來的對比。「#ddHK設計#香港地」係為期三年的創意旅遊計劃，未來活動浪接浪，讀者可上以下網址http://www.designdistrict.hk/tc/home/查詢。