HK Express推激抵平機票 飛鹿兒島來回連稅$897

黛安同好多香港人一樣，平時都會搶平機票去旅行，嚟緊香港快運（HK Express）又有新優惠。今次公司為慶祝載客數字超過1,500萬人，由噚日起至下周日（10日）晚上夜晚11時59分，推出低至$115單程機票優惠，出發日期由呢個月14日到7月6日。黛安精選咗幾個激抵之選畀大家，好似台灣台中來回連稅只需$715，越南芽莊來回連稅$765有得玩，鹿兒島來回連稅都係$897咋。

HK Express嘅網頁都搞搞新意思，用咗互動數碼工具「swift bar」做基礎設計元素，搜尋操作更簡易，方便大家搵到心儀旅遊資訊。HK Express仲轉咗「Your Move」做新口號，鼓勵港人打破單調日常生活節奏，一齊去體驗難忘嘅冒險旅程。

HK Express商務總監Jonathan Hutt同黛安傾偈講開，下半年會公布1至2個位於北亞或東南亞嘅新航點，仲密切研究30個北亞或東南亞嘅可發展航點，黛安都好期待新航綫公布啊。至於國泰早前發表公告確認同HK Express商談收購事項，Jonathan話，仍未確認達成任何協議，會繼續擴展固有業務。