時代廣場浪漫花節 齊齊迎春兼簪花

春天最好去賞花，美麗嘅花卉可以話係世界各地唔同民族表達情感嘅共同語言！由意大利嘅斯佩洛花節、法國嘅鈴蘭節，再到中國古代嘅花朝節等等，人人把酒賞花，仲會將花插喺頭上或冠帽上作裝飾，黛安覺得認真有詩意。如果你都想感受呢個充滿文青味道嘅「花節」，一定唔可以錯過時代廣場下月舉辦嘅「迎春簪花」展覽。

黛安知道，源自古代漢朝，每逢春天舉行嘅「花朝節」，個個都會喺花海入面吟詩作畫、賞花談情，仲會喺頭髮或冠帽上插上簪花慶祝，意味喜慶榮華，相當有意境。為咗延續呢個浪漫花節氣氛，時代廣場下個月8號至24號，就會舉行一個名為「迎春簪花」嘅展覽，展出多種來自中國、荷蘭同台灣嘅花卉，展場仲設有「簪花」影相區，大家可以喺電子畫面上選擇喜愛嘅花，再簪喺頭上影相留念㗎。