傳奇騎師韋達退役 下季設廄從練

賽馬可以話係唔少港人熱愛嘅節目之一，其中具代表性嘅傳奇騎師，一定唔少得現年47歲、曾連續13季雄踞香港冠軍騎師寶座嘅騎師韋達（Douglas Whyte）！黛安知道佢噚日喺沙田日賽結束後正式掛靴，圓滿結束呢30年嘅策騎生涯。

唔講唔知，韋達年僅2歲時就首次坐上馬背，開始跟父親習騎，仲係香港歷來首位贏得1,000場頭馬嘅騎師，至今已贏過1,813場，在港累積接近16億港元總獎金，創下香港騎師贏得最多獎金嘅紀錄，認真犀利！佢話掛靴之後，未來準備跟隨好似岳伯仁、大衞希斯等著名練馬師學藝，喺下個馬季到港設廄從練。

其實，馬會一向都係臥虎藏龍，好似現職馬會馬術場地主任、今年49歲嘅單泰康（Michael）咁，就同時擁有國際馬聯（FEI）頒發嘅「二級場地設計師」資格。黛安知道佢即將聯同另一位德國嘅場地設計師，喺15至17日舉行嘅「浪琴表香港馬術大師賽」中設計各項賽事所用嘅場地障礙賽路綫圖，除咗繪畫路綫圖，仲要計算埋欄杆高度、距離同彎曲度等，少啲技巧都唔得！