Asia Miles 會員突破1100萬 精采活動慶20周年

黛安同唔少香港人一樣，平時最鍾意四圍去旅行，作為精明消費者，當然要學識善用里數換機票嘅大法！唔講唔知，亞洲萬里通（Asia Miles）今年進駐香港20年，仲突破1,100萬名會員，比前一年增加10%，認真犀利！聽公關姊妹講，為慶祝20歲生日，佢哋嚟緊仲會舉行一連串精采活動，絕對不容錯過！

黛安噚日出席亞洲萬里通嘅新春傳媒午宴，同營運總裁雷紹麟（Alan）傾咗陣偈，佢分享1,100萬名會員當中，超過一半都係嚟自中港台等大中華地區，單係香港更已佔咗200幾萬人，即係平均每3個人就有1個係會員，果然好厲害呀！而自Asia Miles去年調整換機票嘅里數以來，多咗20%人成功換到機票，繼續以日韓台等目的地為主。另演唱會門票、其他餐飲產品都有唔少人換呀！

唔止咁，因應今年20周年紀念，Asia Miles仲準備咗一連串活動畀各位會員，聽日仲由「20周年玩轉里賞日」打響頭炮，只要花2,000里數，即可換走AIA友邦歐陸嘉年華入場門票一張、10個嘉年華電子代幣同15分鐘摩天輪等，當日入場仲有里數小熊大追蹤遊戲，集齊小熊印章即可兌換刮刮卡一張，有機會贏取最高2萬「亞洲萬里通」里數，夠晒換張日本來回機票啦！黛安都準備約埋成班姊妹去玩喇！