花形風車轉運 向招財貓許願 新年潮遊日本祭典

話咁快，下個星期就係農曆新年啦！今個新年，唔使去日本都可以着和服？黛安知道今年D‧PARK愉景新城同Aqua Plaza合作，仲得到日本駐香港總領事館同JETRO日本貿易振興機構支持，即日起至下個月17日，舉行全港首個官方「D‧PARK遊世界日本新年祭」，成萬呎嘅日本祭典、特色街道場景、近20個攤位售賣日本空運料理同和式小食，仲有和服體驗，全部喺日本空運到港，180蚊就可試穿30分鐘影返輯賀年相！

如果經過尖沙咀拜年，不妨去The ONE參觀「The ONE x飛天少女豬事丁豬事吉祥遊樂園」，寶妮會喺遊園會正中央化身成3.5米高嘅招財吉祥豬，祝大家豬年大吉、豬籠入水，非常吸睛。其中化身成巨型達摩吉祥物嘅寶妮，就會喺小屋前供大家許願，希望各位都心想事成！

精采又點止咁少，ifc商場亦都換上新裝，以「豐盛花開福滿庭」互動裝置同大家見面，商場今年以花形開運風車做主軸，融入當代花卉元素，寓意新一年迎來源源不絕嘅好運！喺互動裝置嘅風車步道入口，大家仲可參與小遊戲，下載本地書法家李嘉倩（Rita Lee）設計嘅揮春，同親朋摯友分享祝福。

黛安亦知道，黃埔天地今年以寓意財富與幸福嘅「金魚」做主題，商場多處設置喜慶新春「金魚」裝飾，其中位於時尚坊嘅「如意吉祥金魚宮」更加唔可以錯過，巨型魚缸展示咗超過1,000條5大類別嘅意頭活金魚，仲有魚樂無窮新年市集，包括三個大熱攤位遊戲：撈金魚、吊氣球和射槍遊戲，唔使行花市一樣有得玩！