大新推手機遙距開戶 用App辦理10分鐘開通

踏入Digital嘅年代，確實令生活方便咗好多。黛安最近就收到風，知道大新銀行嚟緊會推出「e直通遙距開戶申請」，用手機10分鐘就可完成開戶，啱晒每日都咁繁忙嘅香港人。

呢個「e直通遙距開戶申請」服務，聽講好快捷，無論iOS定Android嘅用家都可以做到。只要經大新銀行手機App按入「e直通遙距申請」，拍下身份證和自拍，個App就會以光學文字辨識和面部識別技術驗證身份，同時可以做到辨識客戶風險和反洗黑錢程序，減低被人假冒嘅風險，真係好高科技！客戶之後再輸入個人資料，喺電子申請表上直接簽名就搞掂，整個過程只需要10分鐘，而且實時啟動，即開即用，入數後就可以即時轉帳啦。

聽大新銀行高級執行董事兼零售銀行處主管王美珍講，銀行會全面打造DS Digital Banking，包括全面電子支付平台、安全生物認證等，配合金管局提倡嘅智慧銀行發展之餘，亦都貫徹品牌理念—「同步更進步」。

遙距開戶暫時仲做緊測試，現階段畀特選客戶試用緊，王美珍估計今年第二季就正式推出喇，大家記得密切留意呀。