利東街睇閃閃金錢 時代廣場瑞獸同遊 精采活動迎豬年

黛安今年決定留港過年，約埋班好姊妹一起迎新禧！公關姊妹就話，灣仔「利東街」今年以「利東喜盈豬」做主題，打造全港最大型戶外新春步行街，懸掛668個「路路發」寓意圓滿、光明的金光千紅燈籠同238個「易發」金光閃閃金錢，行完成條街，包你前途光明、財源滾滾！

黛安仲知道，喺2月19號年宵當日，利東街和The East仲會分別舉行盛大嘅舞獅表演，同財神一齊游走步行街，派發「財運金錢」同幸運小豬布偶，祝大家豬年行大運。

行完發財街，又可以去時代廣場打卡。今年佢哋就嚟一次多國文化Crossover，舉辦「新年與瑞獸同遊」展覽，邀請咗兩位韓國藝術家權河允同晉始瑩以媒體藝術創作8款古代瑞獸，包括龍、鳳、麒麟、玄武等，透過巨型LED幕牆將奇幻異境呈現到大家眼前。最矚目嘅一定係由美國Dog & Pony設計嘅「黃金年華」場景，畀大家穿越黃金花海與瑞獸同遊！

今年豬年，梗係要同豬仔合照啦。兒童繪本《Elephant & Piggie》嘅主角Elephant Gerald同小豬Piggie，就係故事書中跳出來，出現喺銅鑼灣皇室堡，超過3米高巨型鴻運毛毛大豬頭進駐商場，大家可盡情摸摸大頭Piggie，沾沾旺氣！場內仲有經典書中對話框，教小朋友們多個新年祝賀語句，等小朋友們拜年時讓長輩笑逐顏開！

而上水廣場都非常精采，今年以《花妍‧纖藝》做賀年主題，邀來台灣纖維藝術大師劉棟首度來港舉行絎縫藝術展覽，大家記得去見識下呀。