一田超市旺角店重開 「#Food+」主題區邊買邊食

一田超市（旺角）分店都裝修咗半年啦，一田百貨行政總裁黃思麗（Susanna）噚日就同黛安講，將會喺今個星期日（20號）重開！Susanna仲帶埋一眾傳媒行家預覽新店，重開後搬咗去MOKO新世紀廣場嘅5樓，佔地成18,995呎，比之前大咗足足超過一半。

黛安留意到新店多咗個「#Food+」主題區，Susanna話，今次喺第一次同ABC Cooking Studio合作，打造咗「5大自煮食桌」和「6大輕食食桌」，顧客可即場選揀好食物，再交畀廚師即叫即煮，又或喺現場掃一掃QR Code食譜，買返屋企跟住食譜烹調又得，實行「邊買、邊食、邊學」。

自煮食桌嘅選擇都好多，有首次登陸一田嘅日式鐵板燒「Grill+」，用上頂級和牛，好似有日本三大和牛之一嘅近江牛鐵板燒，黛安試完都encore，肉質鮮嫩，甘香唔膩，仲好juicy。而輕食就有嚟自日本九州麵包品牌「糧友」，獨家推出由熊本縣立八代東高等學校學生研發，採用熊本熊紅草莓醬製成嘅「熊紅牛角」，淡香嘅草莓味，加上粒粒朱古力，好食到停唔到口。

除咗食，點少得買。Susanna就介紹女士最重視嘅「日本美肌藥妝專區」，有成過百款面膜，點都有一款啱你；行過少少就有「日本人氣手信區」，連日本東京老字號西式甜點品牌「YOKU MOKU」都有得賣。

一田仲有好多賀年貨品都低至8折。即日起至1月24號，憑指定信用卡簽帳滿$300或以上，即送$60現金禮券；今個周五至周日憑指定信用卡用Apple Pay簽帳滿$500，仲額外送多$80現金禮券，記得去辦年貨啦！