《大帥哥》再次掀起追劇熱潮，除了主角張衞健喜中帶悲演得好動人之外，都要身邊的好兄弟、敵人配合得好，例如劇中已犧牲的徐榮、古明華與Eddie亦深受觀眾歡迎。趁住就快大結局，三人即刻上《兄弟幫》大爆拍劇時的血淚史，細說難忘的拍攝點滴。
1. 為接張衞健即興式表演要保持清醒
張衞健出名很專業和有創意，面對如此厲害的前輩，事前一定要做很多準備功夫。古明華就指如果抓不緊自己的角色設定，和他演對手戲就會接不上：「同佢拍劇係個大挑戰，佢反應好快，預計唔到佢會臨時做啲咩，但拍嗰陣唔係好多時間俾演員準備一場戲，所以要喺屋企適應好個角色，否則拍嗰陣唔單止跟唔上，同埋會冇咗自己。」雖然拍《大帥哥》時每日不斷轉動腦筋很累，不過一向轉數快的古明華就話這就是拍劇有趣的地方：「我從來唔擔心對手有咩勁嘢爆出嚟，因為我投入到角色嗰陣會自自然然即興交流到，唔使特登去諗，如果再演就會好假。」
Eddie非常同意，正因為對手是張衞健，所以自己要做得更加好：「每次返到嚟都會早啲少少入錄影廠，但佢已經坐咗喺度寫緊好多嘢度稿。雖然自己喺屋企都有做功課，不過一埋位佢又同劇本表達方式唔同，除咗自己編排一啲對白接返你，亦會再執一執你嘅對白，令到成場戲多咗笑位。」至於與張衞健扮演兄弟的徐榮就表示自己與他不時臨場互動設計對白，學到唔少嘢：「我哋幾兄弟好多時有集體嘅嘢要做，台詞一齊講，例如『陽壽盡，落陰谷，三衰六旺...』當時佢寫俾我哋嗰陣心諗呢啲對白咁古裝，get唔到，但再喊就feel到嗰個感覺好澎湃，湧出嚟咁。張衞健又會問我哋諗住點演，最記得有一句我自己度：『喂大哥嘅嘢你都好信嘅，佢聽3成，作3成，3成睇心情』，佢聽完之後一開拍就即場作對白接落去：『我聽3成，作3成，我依家冇9成都估到8成啦』，接得好靚！」
2. 犧牲同男人的第一次
劇中徐榮要勾引愛好男人的古明華，其中一幕二人還要獻出第一次──與男人咀咀，不過當時他們同樣留了鬍鬚，親熱場面好重口味：「都幾刺激，好重口味！要簽生死狀！」
▼又真係幾難受......
3. 夏天拍劇熱到光頭龜裂
劇集於夏季拍攝，加上有不少戶外場景，徐榮笑稱Eddie的光頭被曬至龜裂，甚至有中暑徵兆，講唔到對白，要日日飲正氣水死頂。加上當時天氣非常酷熱，高達40幾度，Eddie、徐榮憶述當時一拍完大家就會脫衣：「由底衫到面衫都濕晒，出面乾咗，又由裡面濕返出嚟，」，連外面的磚曬到冒熱氣，即使著住軍鞋都感到地面很燙。不過原來台前不是最辛苦，幕後工作人員一整日不能休息才是最慘，因為他們最早外出，最晚回來。
▼出外景日日都好曬，睇陽光就知
4. 一幕足有七頁半劇本
有幕導演採用一鏡到底的手法，單是劇本已經有七頁半，排練便用上3小時，真正拍就用了5小時。Eddie就話長鏡頭雖然不用中斷情緒，可以將角色一次過發揮出來，不過臨尾就拍完壓力極大，一旦出差錯就會連累大家重新拍過。