原本《大帥哥》行正路喜劇風格，但到最新幾集結局篇故事氛圍馬上急轉，由一開始四兄弟同心協力大放笑彈，變成落難大帥哥慘情逃亡記，當中以扮孫悟空避追殺及獨自懷念徐榮的催淚戲碼最好睇，搞到唔少觀眾爆喊，足見張衞健演技感染力有幾深。張衞健人氣高企，甚至引來一班觀眾為他呼冤，留言狂鬧TVB，不忿《大帥哥》未能趕及在台慶前播放，指TVB浪費張衞健這位人材。見到大家咁支持自己，張衞健竟然於微博晒激罕「爆肌」照多謝大家！認真搞笑。
觀眾不忿《大帥哥》錯失台慶 張衞健感激罕有晒肌
儘管《大帥哥》已經播到尾聲，不過至今有很多網民依然深感不忿，認為《大帥哥》明明拍足半年是心機之作，最後竟由台慶劇淪為炮灰，由王浩信孭飛的《兄弟》取而代之，個個都狂鬧TVB未能珍惜人材，令劇集在頒獎禮捧蛋。見到觀眾咁支持自己，張衞健非常感激大家，又指不介意做倉底貨，反而對此感到開心：「由新入行喺TVB拍劇《西遊記》同《鹿鼎記》都未試過喺台慶劇時間播放，對我嚟講好平常。如果套劇唔Delay台慶，任何嘢（回響）都喺預期內進行其實冇咩特別，反而依家睇到網上聲音話『還我大帥哥！』，會覺得好開心、好Warm，原來你哋真係咁掛住我！」
難得觀眾都紛紛為自己呼冤，張衞健昨日竟然罕有地於微博大晒半裸爆肌照多謝大家！？驟眼望落仲以為是真人操練成果，怎料張衞健保持一貫搞笑風格，原來相中是大帥哥的模型而已，張衞健還說道：「為了對抗惡勢力，大帥哥拼命健身，頗有成效！大家放心他會全力反擊的。」今次擺公仔上枱啫，如果大結局收視高收，張衞健會唔會考慮真係騷肌肉呢？
冇獎仍獲得肯定 個個狂讚慘情催淚戲
雖然《大帥哥》輸檔期，但贏在民意，由參加歌唱比賽到做演員，張衞健將所有時間放在演藝事業上，這次回巢用了半年時間拍攝，張衞健的用心大家都有眼見。劇中洪永城得到大帥之位，張衞健就快要被公開槍斃，兄弟徐榮執意要救人逃獄，亡命在洪永城的槍下，壯烈犧牲。由晚上哭祭徐榮，到早上獨自回想起做大帥初期與兄弟共享榮華的開心時光，即使只有張衞健一人講對白，他的演技都好有感染力，愈喊愈心酸，連觀眾都被他帶動到情緒：「有幾可睇喜劇會睇到眼濕濕，已經連續喊咗好多集」、「笑中帶淚好屈機，呢啲先叫演技」
除此之外，張衞健為逃避軍閥追殺，居然拿起金剛捧扮孫悟空，仲講埋經典金句：「我係如來佛祖玉皇大帝觀音菩薩指定取西經特派使者花果山水濂洞美猴王齊天大聖孫悟空呀，型到掉渣！」，夾埋《西遊記》的背景音樂，好多粉絲16年前的回憶即刻返晒嚟。其實一開始張衞健得到大帥之位雖然冇化妝，但已經扮過一次，今次再扮是想突顯一無所有的對比，有首尾呼應之效。見到張衞健咁花心思，觀眾都話：「得佢先扮得入型入格，好懷念」、「仲有當年身手同風範！」
唔止觀眾愛張衞健，連劇中飾演其軍師的曹永廉亦大讚他：「佢腦筋轉得好快，真係冇乜藝人好似佢咁犀利，同佢拍劇有好多得着，如果要數佢缺點，就只有太認真。」嘩個個都愛張衞健，難怪佢自己唔介意有冇獎項同係咪台慶劇啦！單睇民意，一早贏到噴汁！