「香港掂檔」參與授權展 推廣本地原創品牌

黛安平時都會參觀唔同業界嘅展覽，同業內人士交流意見，包括今年已經嚟到第17屆嘅香港國際授權展。聽公關姊妹講，曾經舉辦好多主題活動推廣本地品牌嘅「香港掂檔」今年仲首度參展！今次「香港掂檔」參展除咗會帶嚟新興原創設計品牌外，仲會有「本地薑」吉祥物畀大家「打卡」！

展覽會將於下星期一至三（7至9號）喺灣仔會展舉行，雖然只限18歲或以上業內人士參觀，不過展覽類別都好廣泛，包括動漫與教育娛樂同埋時尚服飾，連運動品牌都有。

黛安知道，「香港掂檔」嘅參展攤位會用到霓虹招牌作為設計意念，唔單止將本地知名老字號品牌進行二次創作，仲加入咗多款潮語燈箱裝飾，既保留傳統品牌同埋霓虹招牌嘅特色，仲融入埋新潮創作㖭！

黛安仲知道，攤位除咗展出「香港掂檔」一系列自家產品外，仲會帶嚟新興原創設計品牌，包括巨人染Giants Tie Dye同埋練黑龍等，另外多個香港設計嘅卡通同漫畫吉祥物，都喺下星期一（7號）現身攤位同大家見面，大家要把握時機去打卡喇！