賀年布置登陸各大商場 巨型豬仔錢罌迎新春

仲有差唔多1個月就到農曆新年，黛安已好期待睇到各大商場嘅喜慶布置！黛安收到風，除咗iSQUARE會有6米高巨型豬仔錢罌布置外，時代廣場嚟緊都會有好應節嘅「新年與瑞獸同遊」展覽，而港鐵商場仲會推出兩套唔同顏色嘅利市封，同大家一齊喜迎豬年！

黛安細時最鍾意將過年收到嘅利市錢，放入豬仔錢罌，iSQUARE喺今個月8日至2月24日期間，就用豬仔錢罌做賀年裝飾主題，6米高嘅巨型豬仔錢罌將佇立喺商場地下iPIAZZA，豬仔身上唔止畫咗金黃色嘅傳統賀年花卉圖案，仲配襯紅噹噹嘅頸巾，夠晒應節！另外，仲有8隻小豬仔錢罌伴隨左右，小豬仔身上都畫咗有濃厚中國風色彩嘅獨特手繪圖案。睇完裝飾，仲可以行上3樓iFUNCTION，就會見到融入咗懷舊香港老店嘅新春布置，行入裏面仲會見到好多嚟自本土懷舊雜貨店「美樂士多」嘅珍藏絕版復古玩具，同埋好多懷舊零食，大家可以慢慢尋寶！

另外，時代廣場就會喺今個月17日至2月24日舉行「新年與瑞獸同遊」展覽，仲特別邀請咗兩位韓國藝術家權河允同晉始瑩，用媒體藝術創作8款古代瑞獸，包括龍、鳳、麒麟、玄武、瑞獅、貔貅、白虎同獬豸，透過巨型LED幕牆將呢個奇幻異境呈現大家眼前，展覽仲邀請咗香港書法大師華戈為藝術家創作嘅瑞獸題字。

而港鐵公司旗下商場包括德福廣場、青衣城、PopCorn、杏花新城同連理街為迎接豬年，由今個月11日至2月4日推出「時來運轉利是來」利市封，有紫紅同金色兩個顏色共兩套，每套一款共8封利市封。商場會員只要喺商場憑1,000積分或即日用電子貨幣單一消費滿$800就可換到喇！