培幼會冀港人伸援手 助盧旺達女孩重生

「新年快樂」，其實非唾手可得。培幼會總幹事蕭美娟（Kanie）之前約黛安食飯，傾開非洲國家雖然繼續發展，但近年仍然多災多難。好似盧旺達咁，好唔容易捱過1994年種族大屠殺嘅內戰之苦，近年鄰近嘅剛果民主共和國同布隆迪又因政府派系衝突，爆發戰事，造成15萬難民湧入，對盧旺達造成好沉重負擔。

流離失所當然淒涼，率先遭殃嘅更多數係女性。Kanie話之前探訪盧旺達第二大難民營Kigeme，發現營內無電力供應，到咗夜晚治安相當麻麻，「在當地識咗一個11歲嘅難民雅詩，佢全家嚟自鄰國剛果民主共和國，但4兄弟姊妹卻有3個父親，幼妹更是母親被性侵後懷孕所生嘅，相當不幸。」

4成人日均收入少於$15

Kanie仲去咗盧旺達首都外尼亞魯古魯地區嘅一個貧民區，探望咗父母早逝嘅14歲女孩拉蒂法，一問先知拉蒂法為咗養大4個妹妹，每日返學前都會去磚場工作，「搬足6個鐘」而換取只有相當於2.6蚊港幣嘅收入，近日連10歲嘅二妹丹妮都要一齊做苦工搬磚幫補家計。

Kanie慨嘆，盧旺達人民經過內戰之苦後，雖然肯體諒同接收難民，但始終能力有限，國內約4成人而家每日收入都少過1.9美金，折合唔夠15蚊港幣，「女性難民地位較低，且有嚴重嘅早懷孕問題，如果香港人可以幫手助養，畀呢班女仔返學嘅機會，或可以改變佢哋嘅命運。」今年3月培幼會將會再舉行「『愛‧女孩』起跑！」活動支援當地難民，大家一於支持下！