大家樂全綫無飲管 IKEA棄用膠袋 全城撑 齊「走塑」

環保要做得好，除咗個人努力，企業嘅支持都好緊要㗎。黛安知道，大家樂就決定喺新一年擴展「走塑」計劃，元旦起全綫分店「日日無飲管」，即使叫特飲，職員都唔會主動提供膠飲管，希望將塑膠用量減低；而香港IKEA亦決定喺元旦起，全綫分店、餐廳同美食站、仲有瑞典美食廊都會停止供應即棄膠袋，希望顧客可以自備購物袋環保shopping。

而呢條環保路只係啱啱開始咋，大家樂集團首席執行官羅德承話，之前循序漸進，將「無飲管日」由每月一次，縮減到每周一次，到出年「日日無飲管」，都係想逐步改變顧客消費習慣，依家全綫分店都用木棒嚟取代熱飲膠攪棒同膠匙，外賣餐具都唔再放膠刀，嚟緊仲會研究將膠叉同膠羹改成「二合一」，長遠仲想做到唔用即棄膠餐具，「自助點餐機同手機訂餐都有提供自備餐具同走飲管選擇，同埋都同供應商傾緊，有無環保又合乎食物安全嘅嘅替代物料做餐具。」

希望改變市民消費習慣

香港IKEA市場總監程耀毅都話，留意到環保署講香港每日棄置係堆填區嘅膠袋多達690公噸，足足可填滿40幾架雙層巴士，可見對環境影響有幾大，「我明白要改變生活習慣唔容易，希望透過停用膠袋，陪客人建立起自備購物袋嘅良好習慣。」今年下旬，IKEA餐廳同美食站都用可分解物料造餐具取代大部分塑餐具，自備食物盒仲可減1蚊，希望對環境帶嚟良好改變。