喺《是咁的，法官閣下》做律師嘅黃子恆，劇中同麥明詩飾演一對，憑情深兼專業形象成功人氣急升，本來前途一片光明，點知今日驚爆佢透過粉絲聚會結識內地女粉絲Michelle，兩人第二次見面就發生性關係，事後女方懷孕，黃子恆卻堅稱有戴套唔認數，事件曝光後，不單各大討論區出現多個聲討黃生嘅帖文，就連佢嘅社交網站亦遭轟炸，大批網民炮轟佢借偶像身份迷惑粉絲：「佢根本當fans係洩慾工具！」，甚至全城要求封殺，黃子恆嘅演藝事業凍過水。
其實黃子恆早喺兩年前已經被踢爆戀上人妻裕美，事件曝光後令佢形象插水，為求止蝕，佢即刻斬纜。由於早有前科，所以今次風波一出，網民即一面倒鬧爆，兼封佢做TVB賤男。話說於2017年4月30號，黃子恆喺廣州粉絲聚會上主動認識女fans Michelle，之後同佢一直透過wechat聯絡，再借Michelle對自己嘅信任，第二次見面就已經變成喺深圳酒店式住宅。最初佢哋只係睇電視，後尾摸摸吓上埋床，Michelle好無辜咁話：「因為子恆是公眾人物，覺得他不是壞人」
▼受害人Michelle
▼當日黃子恆同其他女粉絲都好close
點知發生咗關係之後，黃子恆足足有半年都冇搵佢，只係傾過幾句偈敷衍Michelle，但紙包唔住火，件事喺粉絲group爆出後，黃子恆為平息件事，承認雙方係好朋友，仲話佢哋中間發生咗誤會。雖然黃子恆私下同Michelle講想自殺，求佢原諒，後來兩人再見面，又發生第二次關係。冇幾耐Michelle就發現自己有咗bb，但無論佢點搵黃子恆，對方都冇覆。依家Michelle已經有咗4個月，只好墮胎唔要bb，佢好無奈咁話：「雖然很危險，但愈快做愈好。」眼見搞到咁大鑊，黃子恆再向對方認錯：「真的不知道怎樣面對你，也不敢面對，不知道應該做甚麼、說甚麼去彌補我的錯，希望我們可以成為朋友。」
不過當事件曝光後，黃子恆接受傳媒訪問，就竟然大改口風，堅稱只係同女fans發生過一次性行為，仲話bb爸爸絕對唔係自己，唔介意驗DNA以證清白喎。睇見偶像再變臉，Michelle就話只能希望大家主持公道。