國際塗鴉藝術家打造聖誕燈飾 中港城開Art Jamming派對

聖誕同新年就快到，黛安而家行街都成日留意啲閃令令燈飾，兼感受濃厚聖誕氣氛！聽公關姊妹講，信和集團首次同國際級街頭藝術家Drew Straker合作，幫中港城嘅節慶燈飾帶嚟全新形象，燈飾充滿住佢標誌性嘅霓虹塗鴉風格，佢仲會喺12月6日嚟到中港城主持Art Jamming派對！

呢個大型燈飾由即日起至下年2月19日喺中港城有得睇。黛安知道，Drew Straker最為人熟悉嘅係2D壁畫，當中仲靈活運用咗霓虹色顏料，營造一種立體視像錯覺，今次佢喺中港城嘅大型燈飾，就以一個搭太空船抵達香港嘅薑餅人做主角，代表香港開展一段精采旅程；佢仲會為面向高鐵西九龍站嘅外牆設計一架聖誕特快列車，車身有佢自己嘅簽名同埋代表街頭文化嘅顏色噴罐，靚之餘仲好有意思！信和集團市務及推廣總經理梁翠珊話，好高興可以請到Drew Straker嚟到兼運用創意，為中港城帶嚟與別不同嘅明亮色彩。

除咗有得睇Drew Straker作品，仲可以親睹佢嘅風采，事關佢會喺12月6號嚟中港城平台同大家一齊開Art Jamming party，除咗有佢即席示範塗鴉外，仲會有DJ表演呀！姊妹們如果想參加，快啲上中港城fb page登記啦！