米芝蓮名廚陳國強主理 海洋公園歎日本美食

海洋公園最近又有新搞作，黛安上星期就應邀去咗海龍王餐廳試食最新推出嘅「陳國強師傅晚市嘗味菜單」，食材由日本入貨，不時不食，完全抓住大家嘅胃，認真有心思！

當晚出席嘅仲有一班傳媒好友同專欄作家，包括查小欣、陶傑等，大家都食過翻尋味。聽公關姊妹講，原來今個月至12月2號係海洋公園嘅「美食月」，園內各大餐廳同美食攤位，好似灣景餐廳、冰極餐廳等，都推出多款以日本風情做主題嘅美食。而當晚試嘅係就由海洋公園顧問廚師兼米芝蓮星級名廚陳國強師傅主理嘅6道菜，每位只係628蚊再加一咋，非常抵食。

第一道冷盤「夢‧醉海洋（花雕清酒浸鮑魚）」就令黛安回味無窮。師傅將原隻澳洲鮑魚，用花雕、清酒、梅酒同少少威士忌浸泡，再用中式調味，配上日式海葡萄、魚子醬、日本雞冠草同昆布做點綴，非常入味，鮑魚彈牙爽滑，好味到連汁都飲埋。

之後仲有陳師傅最拿手嘅滋補燉湯「瑪卡燉海參湯」、「松茸桃豚肉蒸水蛋」、「慢煮黑醋和牛肋肉配玉子包」、「臘味糯米飯拼紅燒桃豚腩」，甜品就係「雪蓮子燉日本南水梨」。其中桃豚肉係香港好少供應㗎，來到一定要試下！

姊妹仲話，今次「美食月」由「JA全農」全力支持，喺挑選日本食材嘅時候畀咗好多專業意見。為咗配合「日本秋祭in香港」活動，今日同聽日會舉行一連串日本文化活動，包括太鼓表演、繪馬祈願、微型壽司工作坊等。啱晒一班「哈日族」去參加，一解「思鄉」情緒啦！