香港迪士尼 10K Weekend 2018 跑步行善兼助弱勢社群

黛安星期五剛從東京回來，噚日未夠7點就去咗參加「香港迪士尼樂園10K Weekend 2018—AIA Vitality健康程式全力支持」跑步活動。活動今年已係第三年舉行，仲遇到好多姊妹同行家。

黛安參加嘅係「香港迪士尼樂園領袖3公里跑」，舊年為咗呢個活動，特別提前兩個月練跑，今年無咁勤力，但都努力練習，比對上一次快咗幾分鐘。期間仲遇到一班傳媒好友同行家，包括太古集團公共事務董事唐偉邦（James）、UNICEF香港總幹事劉玉燕（Jane）、佛教筏可紀念中學校長惲福龍、中旅社副總經理姚柏良（Perry）、醫管局行政總裁梁栢賢同新世界發展企業傳訊部高級經理陳碧霞（Helen）。

聽迪士尼好姊妹Lana講，今年同「港協暨奧委會奧夢成真有限公司」合作舉辦兩項培訓計劃，幫有特殊學習需要同來自少數族裔嘅學生提供跑步訓練，等佢哋透過運動肯定自己，其中約20名來自東華三院何玉清教育心理服務中心嘅年輕人就參加咗「怪獸大學5公里跑」，仲順利完成！

另外，活動又獲友邦慈善基金撥款，資助奧夢成真派出教練，包括著名長跑運動員陳家豪，幫位於大澳嘅佛教筏可紀念中學約20名、部分係少數族裔嘅學生做訓練，兼參加「怪獸大學5公里跑」。而活動部分收益會捐畀東華三院何玉清教育心理服務中心，同埋送出1,100張門票。

今屆有超過1.3萬名健兒參賽，人數破紀錄，比去年足足多咗25%！當中14%來自台灣、泰國、內地、及日本等地，數目都比過去2年有增加。今年嚟參加嘅傳媒行家好多，雖然大家平日都好夜瞓，不過咁有意義嘅事，大家都好踴躍支持，仲恭喜Linda同Lana活動舉辦得非常圓滿！