老友鬼鬼玩轉萬聖節 挑戰黑房迷宮 勇闖魔幻樂園

萬聖節要約人玩，梗係要揀有氣氛又特別嘅活動啦。黛安一早約定姊妹喺呢個月26號，去銅鑼灣FASHION WALK，齊齊玩首度來港嘅Zombie Walk。公關姊妹一早報料，當日會特設6個黑暗關卡，包保參加者可體驗到「黑媽媽、心慌慌」嘅感覺，好似要逃出伸手不見五指嘅黑房迷宮、戴眼罩用盲人杖避開障礙物等，仲可以幫「奧比斯」籌募經費，意義都滿分啦﹗當日大會仲安排咗變裝派對，有專人幫你畫搞鬼面部繪畫，仲有攤位遊戲玩，想「老友鬼鬼」一齊變嘩鬼都得。

玩一日唔夠喉，轉場去黃埔天地就可盡情狂歡。事關商場今年嘅萬聖節活動搞足16日，仲特設2米半高巨型夾公仔機、趣怪冰壺同怪物獵人射擊等11款攤位遊戲，仲會送出成萬份獎品，加埋「嘩鬼巡遊」，真係打卡都打到手軟。

想帶埋小朋友放電，去淘大商場嘅「充氣嘩鬼樂園」就啱晒，場內設4米高嘅巨型南瓜地鼠陣，扮演地鼠嘅玩家要穿梭喺6個地洞之間，邊避開「獵人玩家」攻擊，邊偷取糖果，夠晒刺激好玩。仲可玩埋「魔間玄幻屋」，玩家要騎住充氣戰馬闖關，避開障礙物同巫師、幽靈、蝙蝠同南瓜「交戰」，考驗運動神經之餘，仲激發小朋友想像力。

奧海城融入STEM元素

想融合STEM學習精神，萬聖節期間仲可以去奧海城玩全港首個「OC STEM Lab創意工作室」，學用鐳射切割機整「嘩鬼南瓜食物袋」，應節又學到嘢。旺角雅蘭中心、荷李活商業中心及家樂坊，萬聖節都請嚟日本著名插畫師黑沢勝哉筆下嘅淘氣惡魔樂團JagzZ嚟，大玩Rock "n" Roll互動遊戲，粉絲一定要捧場。